Toqaev: Eshqandaı kedergi men qıyndyqqa qaramaı, elimizdi órkenıet jolyna shyǵarýymyz kerek
TÚRKІSTAN. KAZINFORM – Memleket basshysy Qazaqstannyń tarıhı taǵdyry men keleshek mindetteri týraly aıtty. Sondaı-aq Prezıdent Qazaqstannyń jańa Konstıtýtsııasy – eldiń órkenıet jolyndaǵy bastaýy ekenin erekshe atap ótti.
– Túbegeıli jańǵyrǵan Ata zańymyzdyń preambýlasynda aıtylǵandaı, biz Halyq Konstıtýtsııasyn keleshek urpaq aldyndaǵy jaýapkershiligimizdi tereń sezine otyryp qabyldadyq. Biraq bul – úlken joldyń basy ǵana.
Biz eshqandaı kedergi men qıyndyqqa qaramaı, elimizdi órkenıet jolyna shyǵarýymyz kerek. Halqymyzdyń tarıhı taǵdyry – ózimizdiń qolymyzda.
Qazaqstannan basqa Otanymyz joq. Shyndyqty aıtsaq, Qazaqstannyń damýy men órleýi bizden basqa eshkimge kerek joq. Sondyqtan qazirgi urpaq Otanymyzdyń baıandy bolashaǵy úshin barlyq jaǵdaıdy jasaýy kerek.
Qazaq halqynyń ótken tarıhyn qasiretke toly kúrdeli tarıh dep kúmánsiz aıtýǵa bolady, onyń bárin jaqsy bilesizder. Biraq qazirgi zamanda bul taqyrypty qaıta-qaıta aıtyp, qara bultty tóndirýdiń, muńǵa batýdyń qajeti joq.
Halqymyz tek qana alǵa qaraı zor úmitpen qarap, ilgerileý zamanyna saı óz bolmysyn ózgertip, beıimdep ómir súrýi kerek. Muńdy halyq eshqashan baqytty, tabysty bolmaıdy. Bul da – ómir zańy jáne aqıqat.
Jastardyń bolmysyn joǵary tehnologııalarǵa, tehnıkaǵa burý kerek. Sebebi qazirgi zamandaǵy memleket damýynyń kilti – tehnıka men ozyq tehnologııada, sonyń ishinde eń aldymen jasandy ıntellektide. Bárimiz bir ult bolyp, bir el bolyp osy uly tarıhı joryqta mindetti túrde jeńiske jetýimiz qajet. Bul – bizdiń eń basty mindetimiz, mıssııamyz, - dedi Prezıdent.
Budan buryn Memleket basshysy el qoldaýyna ıe bolǵan naǵyz Halyq Konstıtýtsııasy tuǵyryna qonǵanyn alǵa tartty.
