Toqaev: Erikti bolý – ıgi ister jasaý, jaqsylyq istep, basqaǵa úlgi kórsetý

ASTANA. KAZINFORM – Memleket basshysy Qasym-Jomart Toqaev Volonterler forýmynda sóz sóıledi.

- Barshańyzǵa Volonterler forýmynyń ashylýy qutty bolsyn!

Bul – shyn máninde erekshe basqosý. Bárińiz de búgingi forýmǵa elimizdiń ár aımaǵynan kelip jatsyzdar.

Men Sizderdi qoǵam ıgiligi úshin qyzmet etip júrgen Qazaqstannyń naǵyz otanshyl, jasampaz jáne qamqor jastary dep sanaımyn.

Bıyl búkil álem Halyqaralyq eriktiler jylyn atap ótýde. Ózderińiz bilesizder, bul bastamany men Birikken Ulttar Uıymynyń 75-shi sessııasynda kóterdim. Elimizdiń usynysy jahandyq aýqymda qoldaý tapty. Biz órkenıetti el retinde kúlli adamzatqa ortaq qundylyqtardy dáripteımiz, ony keleshek urpaqqa amanat etemiz.

Erikti bolý – ıgi ister jasaý, jaqsylyq istep, basqaǵa úlgi kórsetý, Otanyńa adal qyzmet etý, týǵan jerińe janashyr bolý degen sóz, - dedi Prezıdent.

Ol nıeti túzý, jany taza adamdar osy joldy tańdaıtynyn, eriktiler qataryna qosylyp, qajyrly eńbek etetinin atap ótti. Onyń paıymynsha, eriktilerdi ozyq oıly qoǵamnyń aınasy dep aıtsaq, artyq bolmaıdy.

Memleket basshysy forýmda aıtylǵan usynystardy qoldaıtynyn jáne olardyń eń paıdalysyn júzege asyrý boıynsha tapsyrma beretinin de jetkizdi

- Naǵyz volonter tutas qoǵamnyń ıgiligin oılaıtyn, elimizdiń murat-múddesin bıikke qoıatyn sanaly azamat ekeni sózsiz.

Osy oraıda, búgin men barsha eriktilerge shynaıy alǵysymdy aıtamyn. Sizder barlyq ıgi istiń basy-qasynda, halqymyzdyń arasynda júrsizder! Elimizdiń damýyna eleýli úles qosyp kelesizder.

Jańa ǵana birneshe azamat sóz sóıledi, salmaqty oılaryn ortaǵa saldy. Utymdy usynystaryn jetkizdi. Olardyń kóbin men qoldaımyn, eń paıdaly usynystaryńyzdy júzege asyrýǵa tapsyrma beremin.

Halqymyz «Aqyl – jastan» dep beker aıtpaǵan.

Qazaqstannyń bolashaǵy – osyndaı belsendi ári jigerli ul-qyzdarymyzdyń qolynda. Bárińizge «Jaraısyzdar!» dep aıtqym keledi, - dedi Qasym-Jomart Toqaev.

Aıta keteıik, búgin Memleket basshysy Ispanııa Koroline quttyqtaý jedelhatyn joldady.