Toqaev Emomalı Rahmonmen sóılesip, qazaq-tájik baılanysyn keńeıtýdiń mańyzyn aıtty
ASTANA. KAZINFORM — Memleket basshysy Tájikstan Prezıdentin týǵan kúnimen quttyqtap, baýyrlas tájik halqynyń ıgiligi jolyndaǵy jaýapty memlekettik qyzmetine tabys tiledi. Bul týraly Aqorda málim etti.
— Qasym-Jomart Toqaev Emomalı Rahmonnyń táýelsiz Tájikstan memleketiniń qalyptasýyna, beıbitshilik pen kelisimdi ornyqtyrýǵa, eldiń uzaqmerzimdi damýyna qosqan tarıhı úlesin atap ótti. Qazaqstan Prezıdenti Tájikstan kóshbasshysynyń eki memleket arasyndaǵy ǵasyrlardan tamyr tartatyn dostyq pen ózara qoldaýǵa negizdelgen strategııalyq seriktestikti jáne odaqtastyqty nyǵaıtýdaǵy róline joǵary baǵa berdi. Áńgimelesý barysynda Qasym-Jomart Toqaev pen Emomalı Rahmon ekijaqty yntymaqtastyqtyń damý qarqynyna kóńil tolatynyn jetkizdi. Sondaı-aq memleketaralyq yqpaldastyqtyń barlyq baǵyty boıynsha qazaq-tájik baılanysyn keńeıtýdiń mańyzyna toqtaldy, — delingen habarlamada.
Memleketter basshylary halyqaralyq jáne óńirlik kún tártibindegi ózekti máseleler boıynsha pikir almasyp, aldaǵy kezdesýler kestesin talqylady.
Aıta keteıik, buǵan deıin Memleket basshysy muǵalimderdi kásibı merekesimen quttyqtady.
