Toqaev elimizdiń ósip-órkendeýine bóget bolatyn kedergilerdi atady
ASTANA. KAZINFORM — Azamattarymyz jańa dáýirde quqyqtyq saýatsyzdyq, áleýmettik masyldyq, jónsiz sóz ben orynsyz synnyń esh paıdasy joq ekenin bilýi qajet. Bul týraly birinshi shaqyrylymdaǵy Quryltaıdyń birinshi sessııasyn ashqan Memleket basshysy Qasym-Jomart Toqaev aıtty.
— Bizdiń qalaǵanymyzdaı jedel bolmasa da, elimiz ǵylymdy, ozyq tsıfrlyq tehnologııalar men jasandy ıntellektini damytýǵa den qoıyp, ınnovatsııalyq órkendeý jolyna baǵyt aldy. Biz áleýmettik memleket retinde azamattardyń áleýetin arttyrýǵa árdaıym basa mán beremiz. Bilim berý, densaýlyq saqtaý, mádenıet, sport jáne kreatıvti ındýstrııa salasyn jan-jaqty damytýǵa aıryqsha nazar aýdaramyz, — dedi Qasym-Jomart Toqaev.
Prezıdenttiń aıtýynsha, memleket maqsatshyl, tabandy, eńbekqor adamdarǵa árdaıym qolaıly jaǵdaı jasaıdy.
— Biz jastarǵa eńbek pen tártiptiń qanshalyqty mańyzdy ekenin túsindirýimiz kerek. Sebebi, bul — tabysqa jetýdiń kózi. Azamattarymyz jańa dáýirde quqyqtyq saýatsyzdyq, áleýmettik masyldyq, jónsiz sóz ben orynsyz synnyń esh paıdasy joq ekenin bilýi qajet. Munyń bári — elimizdiń ósip-órkendeýine bóget bolatyn kedergiler. Salıqaly ulttyq sana-sezimdi qalyptastyrý isine aıryqsha mán berý kerek. Men bul týraly Tamyz konferentsııasynda arnaıy aıttym. Endi osy máselege Quryltaı qabyrǵasynda qaıta oralǵandy jón kórip otyrmyn, — dedi Memleket basshysy.
Sessııa barysynda Memleket basshysy Quryltaı bılik júıesin túbegeıli jańǵyrtatynyn atap ótti.
