Toqaev: elimiz «Qazaqstan – Túrikmenstan – Aýǵanstan – Pákistan» dálizin damytýǵa úles qosýǵa daıyn

ASTANA. KAZINFORM – Qazaqstan Pákistanmen arada saýda-sattyq pen ınvestıtsııa aýqymyn keńeıtedi. Bul týraly Pákistannyń The News International gazetine suhbatynda Qazaqstan Prezıdenti Qasym-Jomart Toqaev málim etti.

– Ekonomıkalyq yntymaqtastyq jáne óńiraralyq baılanys ózara seriktestigimizde aıryqsha mánge ıe. Biz izgi saıası erik-jigerimizdi naqty ekonomıkalyq nátıjege jetý úshin jumsaǵymyz keledi. Atap aıtqanda, saýda-sattyq pen ınvestıtsııa aýqymyn keńeıtip, halyqtarymyz arasyndaǵy baılanysty jandandyrýǵa nıettimiz, - dedi Qasym-Jomart Toqaev.

Sonymen qatar Prezıdent aımaqaralyq baılanysty damytý kún tártibinde turǵan eń ózekti másele ekenin aıtty.

- Bul rette Qazaqstan – Túrikmenstan – Aýǵanstan – Pákistan dálizin qurý jobasyna úles qosýǵa ázirmiz. Bizdiń oıymyzsha, bul jobanyń óńirlerdi baılanystyryp, Ońtústik Azııa naryǵyna shyǵý turǵysynan strategııalyq mańyzy zor. Pákistannyń osy strategııalyq baǵytta elimizben tyǵyz yntymaqtastyq ornatýǵa nıetti ekeni qýantady. Múddeli taraptar kólik-tranzıt jobalaryn tabysty júzege asyrýǵa belsendi atsalysyp, ortaq iske jumyla kirisedi dep úmittenemiz, - dedi Memleket basshysy.

Budan buryn habarlanǵandaı, Prezıdent Qasym-Jomart Toqaev Pákistanǵa memlekettik saparmen bardy.