Toqaev elimizdiń bolashaǵy nemen baılanysty ekenin aıtty

NUR-SULTAN. QazAqparat – Qazirgi balalar men jastar 2050 jylǵa qaraı Qazaqstannyń eńbek naryǵyn kórsetedi. Bul týraly QR Prezıdenti Qasym-Jomart Toqaev jetinshi shaqyrylymdaǵy QR Parlamentiniń birinshi sessııasynda aıtty, dep habarlaıdy QazAqparat tilshisi.

«Myqty ınklıýzıvti qoǵam qurýdaǵy basty qural – tıimdi áleýmettik saıasat bolyp sanalady. Adam damýy ındeksiniń kóptegen kórsetkishteri boıynsha eleýli progreske qaramastan, Qazaqstan jetekshi elderden artta qalyp otyr. Adamı kapıtaldyń joǵary sapasy – Qazaqstandy qosa alǵanda, barlyq memleketterdiń uzaq merzimdi básekege qabilettiginiń negizi. Álem bilim ekonomıkasyna bet buryp jatyr. Bul shyndyq», - dedi Memleket basshysy.

Prezıdenttiń aıtýynsha, qazir Táýelsizdik urpaqtary sany jaǵynan elimizdiń barlyq azamattarynyń jartysyn quraıdy.

«Qazirgi balalar men jastar 2050 jylǵa qaraı Qazaqstannyń eńbek naryǵyn kórsetedi. Elimizdiń bolashaqtaǵy ál-aýqaty dál solardyń básekege qabilettigine baılanysty», - dep atap ótti Q. Toqaev.