Toqaev ekologııa salasyna jańa strategııalyq mindetter júktedi
ASTANA. KAZINFORM — Memleket basshysy Ekologııa jáne tabıǵı resýrstar mınıstri Álibek Qýantyrovty qabyldady, dep habarlaıdy Aqordanyń baspasóz qyzmeti.
— Kezdesýde Prezıdent Qasym-Jomart Toqaev mınıstrliktiń negizgi mindetterin aıqyndap, orman qoryn qalpyna keltirý jumystaryn jalǵastyrýdy, ulttyq parkter ınfraqurylymyn damytýdy, qaldyqtardy óńdeý esebinen tuıyq tsıkldi ekonomıka qalyptastyrýdy tapsyrdy, — delingen habarlamada.
Astana, Almaty jáne Shymkent qalalarynda qaldyqtardy energetıkalyq kádege jaratatyn zaýyt salyp, bul isti basqa óńirlerde de jalǵastyrý keleshegine erekshe nazar aýdaryldy.
Sondaı-aq ekologııalyq mádenıetti arttyrý men «Taza Qazaqstan» bastamasyn ary qaraı tıimdi iske asyrýdyń mańyzyna mán berildi.
Aıta keteıik, keshe Álibek Qýantyrov Ekologııa jáne tabıǵı resýrstar mınıstri bolyp taǵaıyndalǵany belgili boldy.
Buǵan deıin Memleket basshysy Qasym-Jomart Toqaev Qazaqstanǵa resmı sapary aıaqtalǵan Laos Prezıdenti Thonglýn Sısýlıtti elorda áýejaıynan shyǵaryp salǵanyn jazǵan edik.
