Toqaev ekinshi deńgeıli bankterge: Kezinde sizderge kómektestik, endi sizderdiń kezekterińiz keldi

ASTANA. KAZINFORM — Prezıdent Qasym-Jomart Toqaev Úkimettiń keńeıtilgen otyrysynda Ekinshi deńgeıdegi bankterdiń resýrstaryn úkimettik baǵdarlamalarǵa tartý týraly oı aıtty.

— Ekinshi deńgeıdegi bankterdiń resýrstaryn úkimettik baǵdarlamalarǵa, atap aıtqanda, iri ınfraqurylymdyq jobalardyń qurylysy men jańǵyrtý jumysyna tartýǵa bolady jáne tartý kerek degen másele kóp aıtyldy. Memleket bóletin qarajatty kezeń-kezeńimen nesıe mólsherlemesin sýbsıdııalaýǵa qaraı baǵyttaý kerek. Bul qarjylandyrý kólemin birneshe ese ulǵaıtyp, bankterdiń aqshasyn ekonomıkalyq aınalymǵa qosýǵa múmkindik beredi, — dedi Qasym-Jomart Toqaev.

Memleket basshysy 2017 jyldan bastap 2020 jylǵa deıin birqatar iri bankke memleket tarapynan, sonyń ishinde Ulttyq qor esebinen 15 jyl merzimge qarjylaı qoldaý kórsetilgenin eske saldy.

— Bul kómek bank aktsıonerleri de ortaq jaýapkershilikke ıe bolady degen talappen berildi. Keıbir bank óz shyǵyndaryn áldeqashan ótegen. Biraq memlekettiń ıeligindegi qarjyny qaıtarýǵa asyqpaıdy. Tipti ony joǵary paıyzben táýekeli az memlekettik qarjy quraldaryna salyp, kepildi tabys taýyp otyr. Úkimet pen Ulttyq bankke shara qabyldaýdy tapsyramyn. Bir nárseni atap ótkim keledi: bankter Úkimettiń, sonyń ishinde halyqtyń jaýy emes. Biraq dıalog negizindegi ádil seriktestik ornaýǵa tıis. Kezinde sizderge kómektestik, endi sizderdiń kezekterińiz keldi, — dedi Memleket basshysy.

Aıta keteıik, elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. 

Іs-sharany ashqan Prezıdent Úkimet pen ákimder jumysynyń tıimdiligi azamattardyń turmys sapasyna qaraı baǵalanatyn aıtty. 

Sonymen qatar Memleket basshysy tıimdiligi tómen sýbsıdııalaý tásilinen jeńildikpen nesıe berý tásiline kóshý qajet ekenin atap ótti.