Toqaev: Eki memleket arasyndaǵy baılanys eýrazııalyq qaýipsizdik júıesiniń mańyzdy elementine aınaldy

MÁSKEÝ. KAZINFORM — Qasym-Jomart Toqaev pen Vladımır Pýtın buqaralyq aqparat quraldaryna birlesken málimdeme jasady, dep habarlaıdy Aqordanyń baspasóz qyzmeti.

Memleket basshysy atalǵan sapar eki el arasyndaǵy strategııalyq seriktestik pen odaqtastyq qarym-qatynasty odan ári nyǵaıtý turǵysynan asa mańyzdy dep sanaıdy.

— Búgin qol jetkizilgen ýaǵdalastyqtar elderimiz arasyndaǵy san qyrly yntymaqtastyqtyń tabysty damyp kele jatqanyn tolyq kórsetedi. Bul biregeı yqpaldastyq óz baǵytynan aınymaıdy. Meniń oıymsha, postkeńestik keńistiktegi eki jetekshi memleket arasynda ornaǵan jan-jaqty baılanystyń aýqymy, shyn máninde, eýrazııalyq qaýipsizdik júıesiniń mańyzdy elementine aınaldy. Bul tujyrymdamany birqatar múddeli memleket talqylap, zerdeleýde. Eń bastysy, bizdi ǵasyrlardan tamyr tartatyn baı tarıhymyz, belsendi mádenı-rýhanı baılanystarymyz, ortaq qundylyqtarymyz, zamanaýı syn-qaterlerge qatysty uqsas kózqarasymyz ben bolashaqqa baǵdarymyz biriktiredi. Osyndaı berik negizge qurylǵan strategııalyq seriktestigimiz barlyq baǵytta qarqyndy damyp keledi. Bıyl memleketterimiz úshin máni zor birqatar mereıtoılyq data atalyp ótti. Biz Uly Otan soǵysyndaǵy Jeńistiń 80 jyldyǵyn laıyqty deńgeıde merekeledik. Osylaısha, Otandy qorǵaý jáne Uly Jeńiske jetý jolynda álem tarıhynda buryn-sońdy bolmaǵan birliktiń úlgisin pash etken naǵyz batyrlar men patrıottardy eske alyp, qurmet kórsettik. Áıgili Baıqońyr ǵarysh aılaǵynyń 70 jyldyǵy da aıtýly oqıǵa boldy. Bul — ǵaryshty ıgerý isinde uzaq jyldar boıy ǵylymı-tehnıkalyq yntymaqtastyǵymyzdy tanytyp kele jatqan biregeı joba. Qazaqstan-Reseı memlekettik shekarasy týraly sharttyń 20 jyldyǵy — mańyzdy meje. Bizdiń qurlyq arqyly ótetin álemdegi eń uzyn shekaramyz — tatý kórshiliktiń jarqyn sımvoly, — dedi Toqaev.

Osydan buryn Qasym-Jomart Toqaev pen Vladımır Pýtın eki el delegatsııalarynyń qatysýymen keńeıtilgen quramda kelissóz júrgizgeni habarlandy.