Toqaev EAEO men Úndistan arasyndaǵy erkin saýda aımaǵyn qurý kelissózderin qoldady
ASTANA. KAZINFORM – Memleket basshysy Qasym-Jomart Toqaev Joǵary Eýrazııalyq ekonomıkalyq keńestiń keńeıtilgen otyrysynda EAEO syrtqy ekonomıkalyq baılanystaryn Arab álemi elderimen, Ońtústik-Shyǵys Azııamen, Afrıkamen jáne Latyn Amerıkasymen keńeıtý qajettigin aıtty.
Prezıdent Úndistanmen erkin saýda aımaǵyn qurý jónindegi kelissózderdi qoldady.
Onyń aıtýynsha, odaq syrtqy naryqtaǵy saýda-ekonomıkalyq áleýetin odan ári iske asyrýy qajet.
– Odaqtyń Arab álemi elderimen, Ońtústik-Shyǵys Azııamen, Afrıkamen jáne Latyn Amerıkasymen, sondaı-aq bedeldi óńirlik ekonomıkalyq birlestiktermen baılanysyn odan ári keńeıtý qajet. Qazir Úndistanmen erkin saýda aımaǵyn qurý jónindegi kelissózder belsendi túrde júrgizilip jatyr. Bul jumystyń mańyzy zor dep sanaımyn, – dedi Qasym-Jomart Toqaev elordada Táýelsizdik saraıynda ótken kezdesýde.
Sonymen birge, Memleket basshysy Belarýs prezıdentiniń baqylaýshy mártebesin berý jáne erkin saýda týraly kelisimder jasaý máselesine qatysty anaǵurlym iriktemeli tásil qoldaný jónindegi usynysyn qoldady.
– Erkin saýda aımaqtaryn quratyn áriptester de, baqylaýshy mártebesin alatyn elder de belgili bir irikteý qaǵıdattary boıynsha tańdalýy kerek. ıAǵnı, jappaı emes, Eýrazııalyq ekonomıkalyq odaqqa naqty paıda ákeletin, belgilengen krıterıılerge saı keletin elder bolýy qajet. Qazaqstan EAEO organdaryndaǵy tóraǵalyǵy aıasynda odaqtyń ortaq ekonomıkalyq áleýetin nyǵaıtýǵa jáne qatysýshy elderdiń turaqty damýyn qamtamasyz etýge barynsha qoldaý kórsetýdi jalǵastyrady. Birlesken kúsh-jigerdiń arqasynda úlken nátıjelerge qol jetkizip, odaq aıasyndaǵy yntymaqtastyqty jańa sapaly deńgeıge shyǵaratynymyzǵa senimdimin, – dedi Qazaqstan Prezıdenti.
Aıta keteıik, Astanada Joǵary Eýrazııalyq ekonomıkalyq keńestiń otyrysy bastaldy. Bul jıynǵa Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan keldi.
Bıyl Qazaqstan Respýblıkasy EAEO organdaryna tóraǵalyq etip otyr. Memleket basshysy Qasym-Jomart Toqaev 2025 jylǵy 31 jeltoqsanda EAEO memleketteri basshylaryna joldaǵan úndeýinde Qazaqstan tóraǵalyǵynyń negizgi basymdyqtaryn aıqyndady.
Olar: jasandy ıntellektini ekonomıkalyq ıntegratsııany damytýdyń jańa quraly retinde damytý, EAEO logıstıkalyq keńistiginiń áleýetin paıdalaný, ónerkásip pen agroónerkásip keshenin tsıfrlandyrý, ózara saýdadaǵy ákimshilik kedergilerdi qysqartý jáne úshinshi eldermen ekonomıkalyq yntymaqtastyqty keńeıtý.
