Toqaev: EAEO ıntegratsııasynyń strategııalyq baǵyttary qosymsha talqylanýy kerek
«Joǵary Eýrazııalyq ekonomıkalyq keńeste Belarýstyń tóraǵalyǵy kúrdeli jaǵdaıda ótip jatyr. Sáýir aıynda Aleksandr Lýkashenkonyń (Belarýs Prezıdenti- avt.) bastamasymen biz Joǵary keńestiń jumys otyrysyn jańa formatta ótkizgen edik. Tsıfrlandyrý damyp kele jatqan dáýirde jedel sheshim qabyldaýda jumystyń bul formaty edáýir mańyzdy ári tıimdi dep esepteımin. Shaǵyn quramdaǵy kún tártibiniń jobasyna bizdiń ıntegratsııanyń bolashaǵy men Eýrazııalyq ekonomıkalyq ıntegratsııanyń 2025 jylǵa deıingi strategııalyq baǵyttaryna qatysty mańyzdy máseleler enedi. Jalpy onyń qabyldanýyn qoldaımyn. Áıtse de onda qosymsha talqylaýdy qajet etetin máseleler bar dep esepteımin», - dedi Qasym-Jomart Toqaev Joǵary Eýrazııalyq ekonomıkalyq keńestiń onlaın rejımdegi otyrysynda.
Prezıdent óz sózinde ıntegratsııanyń negizgi kontýrlaryn túzetetin atalǵan qujattyń mańyzyn eskere otyryp, qosymsha talqylaýdan ótkizip, qabyldaý kerektigin aıtyp ótti.
«Erte me, kesh pe – bir-birimizben kezdesemiz. Qazir qujatqa qatysty keıbir pikirimdi bildirsem deımin. Birinshiden alǵa jyljýdyń berik irgetasyn qalaý kerek dep esepteımin. Taýarlardyń is júzinde, kedergisiz ári shekteýsiz qozǵalysyn qamtamasyz etý kerek. Sektordaǵy taraptardyń kelisýimen qyzmetterdiń biryńǵaı naryǵyn quryp, ortaq energetıkalyq jáne qarjylyq naryqqa daıyn bolǵan abzal. Sózsiz bizdiń memleketterimizdiń arasyndaǵy seriktes jan-jaqty sıpatqa ıe. Ol – ekonomıkalyq, áleýmettik jáne gýmanıtarlyq salanyń barlyq spektrin qamtıdy. Bul máselelerdiń bárin Eýrazııalyq ekonomıkalyq komıssııany tarta otyryp, besjaqty formatta qarastyrý – onyń shynaıy júzege asýyn kúrdelendirýi múmkin. Densaýlyq saqtaý, bilim, ǵylym máselelerin Eýrazııalyq ekonomıkalyq komıssııanyń quziretine engizý – onyń ekonomıkalyq baǵyttaryn da ózgertip jiberýi múmkin. Basqasha aıtqanda bul 2015 jyly qurylǵan Eýrazııalyq ekonomıkalyq odaqty qurý kelisiminiń mániniń ózine qaıshy kelýi yqtımal. Sol sebepti bul baǵytta strategııalyq baǵyttardyń jobasynyń sheginde áreket etken, ıaǵnı ony ekonomıka salasy retinde qarastyrǵan abzal», - dedi Memleket basshysy.
