Toqaev Djordja Melonıdi Italııa Úkimetiniń tarıhı jetistigimen quttyqtady
ASTANA. KAZINFORM — Qazaqstan Prezıdenti Qasym-Jomart Toqaev Italııa Respýblıkasynyń Premer-mınıstri Djordja Melonıdi onyń Úkimetiniń Italııa tarıhyndaǵy eń uzaq ýaqyt qyzmet atqarǵan Úkimetke aınalýyna baılanysty quttyqtaý joldady.
— Italııa Respýblıkasynyń tarıhyndaǵy eń uzaq ýaqyt qyzmet atqarǵan Úkimettiń qurylýyna baılanysty Premer-Mınıstr Djordja Melonıge shyn júrekten jyly lebizimdi bildiremin. Onyń parasatty ári batyl basshylyǵy, Italııanyń ulttyq múddeleri men abyroıyn qorǵaýǵa degen berik ustanymy el ekonomıkasynyń turaqty damýyna jáne halyqaralyq arenadaǵy bedeliniń nyǵaıýyna yqpal etti. Qazaqstan men Italııa arasyndaǵy dostyq pen strategııalyq áriptestikti nyǵaıtýǵa qosqan jeke úlesin joǵary baǵalaımyn. Aldaǵy ýaqytta da tyǵyz yntymaqtastyǵymyzdy jalǵastyrýǵa nıettimin. Premer-mınıstr Melonıge joǵary memlekettik qyzmetinde tolaǵaı tabys, al Italııa halqyna odan ári órkendeý men ilgerileý tileımin, — dep jazdy Prezıdent H áleýmettik jelisindegi paraqshasynda.
My warmest congratulations to Prime Minister @GiorgiaMeloni on her government becoming the longest-serving in the history of the Italian Republic.
— Qasym-Jomart Toqayev (@TokayevKZ) September 4, 2026
Her wise and strong leadership, steadfast commitment to defending Italy's national interests and dignity have sustained the… pic.twitter.com/vnE9tvyOLq
Aıta keteıik, 4 qyrkúıekte Djordja Melonı basqaratyn Italııa mınıstrler kabınetiniń úzdiksiz jumys istegenine 1 413 kún tolyp, Sılvıo Berlýskonıdiń ekinshi úkimetiniń qyzmet etý merziminen asyp túskeni belgili boldy. Osylaısha Melonı úkimeti Italııada bılik basynda bolý merzimi boıynsha rekord ornatty.
Djordja Melonı úkimeti 2022 jylǵy 22 qazanda ant qabyldaǵan. Buǵan deıingi rekord Sılvıo Berlýskonıdiń ekinshi úkimetine tıesili edi. Ol 2001 jylǵy maýsymnan 2005 jylǵy sáýirge deıin, ıaǵnı 1 412 kún bılik etti.
Eske salsaq, byltyr mamyr aıynda Italııa premeri Qazaqstanǵa resmı saparmen keldi.
Memleket basshysy Qasym-Jomart Toqaev Aqordada Qazaqstanǵa resmı saparmen kelgen Italııa Premer-mınıstri Djordja Melonıdi qarsy aldy. Keıinnen Qasym-Jomart Toqaev pen Djordja Melonı kelissóz júrgizdi.
Jalpy elordada ótken «Italııa — Qazaqstan» iskerlik forýmynda eki eldiń uıymdary jalpy somasy 180 mıllıon eýro bolatyn 10 memorandýmǵa qol qoıdy.
Italııa Premer-mınıstri Djordja Melonı Memleket basshysy Qasym-Jomart Toqaevty eń syndarly kóshbasshylardyń biri dep atady.
