Toqaev Dubai World Trade Center basshylyǵymen tsıfrlyq ekonomıkany damytý máselesin talqylady
ASTANA. KAZINFORM — Memleket basshysy Dubai World Trade Center atqarýshy vıtse-prezıdenti Trıksı Lohmırmandty qabyldady, dep habarlaıdy Aqordanyń baspasóz qyzmeti.
Kezdesý barysynda Qazaqstannyń tsıfrlyq ekonomıkasyn damytý jáne halyqaralyq tehnologııalyq platformalar aıasyndaǵy yntymaqtastyqty keńeıtý perspektıvalary talqylandy. Prezıdent Qazaqstan aldaǵy úsh jylda tolyq tsıfrlyq memleketke aınalý jóninde órshil maqsat qoıǵanyna nazar aýdardy.
Almatyda ótip jatqan Ortalyq Azııadaǵy alǵashqy GITEX AI Central Asia & Caucasus forýmy osy strategııalyq baǵdardyń aıqyn mysaly sanalady jáne elimizdiń jahandyq tehnologııalyq kún tártibin qalyptastyrý isine atsalysýǵa daıyn ekenin kórsetedi.
Kezdesýde Almatynyń tehnologııalyq hab retindegi róline aıryqsha mán berildi. Bul qalada elimizdegi IT-kompanııalardyń úshten biri shoǵyrlanǵan. Damyǵan ekojúıe quramynda belsendi startaptar, ınvestorlar men halyqaralyq oıynshylar bar.
Qasym-Jomart Toqaev Trıksı Lohmırmandtyń GITEX AI Central Asia & Caucasus forýmyn halyqaralyq deńgeıde ilgeriletýge sińirgen eńbegin joǵary baǵalady.
Dubai World Trade Center atqarýshy vıtse-prezıdenti atalǵan alań tehnologııalyq naryqtyń negizgi qatysýshylarynyń basyn qosyp, jańa seriktestikter tabýǵa jol ashatynyn atap ótti.
— Áńgimelesý barysynda GITEX AI Central Asia & Caucasus alańyn Ortalyq Azııada jyl saıyn uıymdastyrý, sondaı-aq Qazaqstanda basqa da óńirlik aýqymdaǵy is-sharalar ótkizý múmkindikteri qarastyryldy, — delingen habarlamada.
Osyǵan deıin Qasym-Jomart Toqaev Sinovation Ventures jáne 01ai kompanııalarynyń bas dırektoryn qabyldaǵanyn jazdyq.
