Toqaev din kóshbasshylarynyń adamgershilik qundylyqtardy dáripteýge qosqan úlesin atady
«Álemdegi eń bedeldi rýhanı kóshbasshylardyń basyn qosyp, dıalog qurý biz úshin zor mártebe. Qazaqstanǵa alǵash ret memlekettik saparmen kelgen Vatakannyń jáne Katolık shirkeýiniń basshysy, Rım Papasy Frantsıskige iltıpatymdy bildiremin. Siz dinder jáne halyqtar arasyndaǵy ózara túsinistikti nyǵaıtýǵa zor úles qostyńyz. Kóne «Ál-Azhar» ıslam ýnıversıtetiniń bas ımamy, joǵary mártebeli doktor, sheıh Ahmad at-Taıebtiń elimizge arnaıy kelgenine qýanyshtymyn. Qazaqstan halqy ózińizdi qazirgi musylman áleminiń kórnekti oıshyly retinde qurmet tutady. Siz din jolynda adal qyzmet atqaryp, adamgershilik qundylyqtardy dáripteýge ólsheýsiz eńbek sińirip kelesiz», - dedi Memleket basshysy.
Sonymen qatar Prezıdent orys pravoslav shilkeýiniń joǵary ókilderine qoshemet bildirdi. Pravoslav hrıstıandary birlik pen kelisimdi nyǵaıtýda eleýli úlesin qosyp otyr.
Munymen qosa Qasym-Jomart Toqaev búgin forýmǵa Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıf qatysyp otyrǵanyn eske saldy. Osy oraıda bul saparǵa erekshe mán beriletini aıtyldy.
«Barshańyzǵa shaqyrýymyzdy qabyl alyp, Qazaqstanǵa kelgenderińiz úshin alǵys aıtamyn. Bul beıbitshilikti saqtaýǵa jáne órkenıetaralyq dıalogty nyǵaıtýǵa bárimizdiń múddeli ekenimizdi kórsetedi», - dedi Memleket basshysy.
Dinı forýmǵa arnaıy qonaq Rım Papasy Frantsıskten bólek Ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy III Teofıl, Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıf jáne basqa da dinı jetekshiler, birqatar halyqaralyq uıym ókilderi qatysýda.
Keshe keshke Prezıdent Qasym-Jomart Toqaev sezdiń arnaıy qonaǵy Rım Papasy Frantsıskti elorda áýejaıynan kútip aldy.
Keıinnen Qazaqstan Prezıdenti men Rım Papasy azamattyq qoǵam jáne dıplomatııalyq korpýs ókilderimen kezdesti.
Kezdesýde katolık shirkeýiniń basshysy Qazaqstannyń ólim jazasynan bas tartqanyna joǵary baǵa berip, Qazaqstan Konstıtýtsııasynyń nanym-senim bostandyǵynyń kepili ekenin atady.
Din kóshbasshysy Frantsısktiń elimizge memlekettik sapary Rım Papasy Ioann II Pavel Qazaqstanǵa 2001 jyly kelgennen keıin alǵash ret ótip jatyr. Búgin ol elordada messa ótkizedi. Oǵan 3 myńǵa jýyq adam qatyspaq.
