Toqaev daıyn ónimdi basqa elderden satyp alatynymyz jaıynda: Mundaı tájirıbeni doǵarý kerek
ASTANA. KAZINFORM — Shıkizat eksporttaǵannan góri, odan daıyn ónim óndirip, syrtqa shyǵarý áldeqaıda paıdaly. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
- Jańa ınvestıtsııalar eń aldymen elimizdegi zamanaýı ónerkásiptiń negizin qalyptastyrýǵa baǵyttalýy kerek. Bul salada biraz jetistikke jettik. Byltyr óńdeý ónerkásibi turaqty damyp, 6,4 paıyzǵa ósti. Biraq óńdelgen taýar eksporty 2,7 paıyzǵa tómendedi. Buǵan jalpy eksporttyń 4,2 paıyzǵa azaıǵany da áser etti. Ónerkásip saıasatynyń basty kemshilikteri dál osy tusta anyq baıqaldy. Bul salada shıkizat óndirýshilerdiń úlesi áli de basym. Biraq bul olarǵa kedergi jasaýǵa bolady degen sóz emes, kerisinshe, olarǵa kómegimizdi áldeqaıda kúsheıtýimiz qajet, - dedi Prezıdent.
Sonymen qatar Memleket basshysy óńdeý ónerkásibine basa nazar aýdarý kerektigin aıtty.
- Óńdeý ónerkásibindegi ónimniń 40 paıyzdan astamy metallýrgııaǵa tıesili. Al metallýrgııa sektorynda eksportqa shyǵarylatyn taýardyń jartysynan kóbi – tómen deńgeıde óńdelgen ónimder. Sonyń saldarynan, shıkizatty syrtqa shyǵaramyz da, odan jasalǵan daıyn ónimdi basqa elderden satyp alamyz. Paradoks. Mundaı tájirıbeni doǵarý kerek, - dedi Qasym-Jomart Toqaev.
Prezıdenttiń aıtýynsha, shıkizat eksporttaǵannan góri, odan daıyn ónim óndirip, syrtqa shyǵarý áldeqaıda paıdaly ekenin basa atap ótti.
- Árıne, bul ońaı mindet emes. Biraq úlgili kásiporyndar bar, mysaly, Qarmet. Qansha qıyndyqqa tap bolsa da, ondaǵy óndiristik jáne áleýmettik protsesterde oń ózgerister oryn alyp jatyr. Bul máselede «artyq qylam dep, tyrtyq qylýǵa da» bolmaıdy. Óńdeý salasyn damytamyz dep, shıkizat óndirý isine zııan keltirmeý jaǵyn oılaý kerek. Úkimettiń saıasaty aqylǵa qonymdy, baıypty bolýǵa tıis, - dedi Memleket basshysy.
Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.
