Toqaev CMA CGM kompanııasynyń prezıdentin qabyldady

PARIJ. KAZINFORM - Memleket basshysy CMA CGM kompanııasynyń prezıdenti Rodolf Saadty qabyldady, dep habarlaıdy Aqorda.

Prezıdent kezdesýde Qazaqstannyń kólik-logıstıka keshenin damytýǵa erekshe nazar aýdardy.

Qasym-Jomart Toqaev elimizdiń geografııalyq turǵydan utymdy ornalasýy Shyǵys – Batys, Ońtústik – Soltústik kólik baǵyttaryn damytýda negizgi ról atqaratynyna toqtaldy. Júk tasymalynyń kólemin arttyrý maqsatynda álemniń iri kompanııalarymen birge ınvestıtsııa tartý jumystary qyzý júrip jatyr.

Memleket basshysy óńirlik shtab-páteri Almaty qalasynda ornalasqan CMA CGM kompanııasymen uzaqmerzimdi seriktestikti odan ári nyǵaıtýǵa nıetti ekenin jetkizdi.

Kezdesýde Transkaspıı halyqaralyq kólik baǵyty aıasynda ózara is-qımyl jasaý, Aqtaý teńiz portynyń logıstıkalyq ınfraqurylymyna ınvestıtsııa tartý, sondaı-aq Kaspıı teńizindegi aılaqtarǵa arnalǵan júk kemelerin qurastyrý máselelerine basa mán berildi.

CMA CGM (Compagnie Maritime d’Affrètement – Compagnie Générale Maritime) – 1978 jyly Frantsııada negizi qalanǵan júk kemelerin qurastyratyn álemdegi eń iri kompanııalardyń biri. Kásiporynnyń 160 eldi qamtıtyn jahandyq jelisi bar. Onyń quramynda 400-ge jýyq keńse men 600-den astam konteıner tasymaldaıtyn keme jumys isteıdi. Byltyr kompanııanyń saýda-sattyq kólemi 47 mıllıard dollardy qurady.

Aıta keteıik, buǵan deıin Prezıdenttiń Frantsııa Respýblıkasyna memlekettik saparmen barǵanyn jazǵanbyz.

Sonymen qatar, Kazinform tilshisi Qazaqstan men Frantsııa qarym-qatynasynyń nyǵaıýyn jan-jaqty qamtyp kórdi.

Elıseı saraıynda Qazaqstan Prezıdenti Qasym-Jomart Toqaevty resmı qarsy alý rásimi ótti.

Qazaqstan men Frantsııa Prezıdentteri Birlesken deklaratsııa qabyldady.