Toqaev tsıfrlyq tehnologııalarǵa kóshken kásiporyndar sanyn 200-ge jetkizýdi tapsyrdy

NUR-SULTAN. QazAqparat – Úkimet 2025 jyly tsıfrlyq tehnologııalar engizgen kásiporyndar sanyn 200-ge jetkizýi tıis. Bul týraly búgin QR Prezıdentiniń «Altyn sapa» syılyǵyn tapsyrý rásiminde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Otandyq ónerkásipti damytýdyń ózekti ári mańyzdy baǵyttarynyń biri «4.0 Indýstrııasyn» damytý sanalady. Búgingi kúni bul baǵytta búkil el boıynsha qazaqstandyq ónerkásiptik kásiporyndardy tsıfrlandyrý boıynsha ilki jobalar – barlyǵy 7 modeldik tsıfrlyq fabrıka júzege asyrylyp jatyr», - dedi Memleket basshysy.

Osy oraıda Qasym-Jomart Toqaev el Úkimetiniń aldyna tsıfrlandyrýdy engizgen kásiporyndar sanyn arttyrý mindeti qoıylǵandyǵyn atap ótti.

«Úkimet aldynda 2025 jylǵa qaraı tsıfrlyq tehnologııalardy engizgen iri jáne shaǵyn óńdeý ónerkásibi kásiporyndarynyń sanyn 200-ge deıin jetkizý mindeti tur. Árıne, bul qıyn mindet. Degenmen, ony Úkimet pen barlyq atqarýshy organdar júzege asyra alady dep oılaımyn. Nátıjesinde tehnologııalyq damýdyń qazirgi deńgeıi «aqyldy» óndiris dep atalatyn deńgeıge, ıaǵnı tolyq avtomattandyrý men robottandyrýǵa kóshý qamtamasyz etilýi tıis», - dedi QR Prezıdenti.