18:02, 09 Maýsym 2017 | GMT +5
Toqaev BUU-nyń bas hatshysy Antonıý Gýterrıshpen kezdesti
ASTANA. QazAqparat - QR Parlamenti Senatynyń tóraǵasy Qasym-Jomart Toqaev Shanhaı yntymaqtastyq uıymynyń sammıtine qatysý úshin Astanaǵa kelgen Birikken Ulttar Uıymynyń Bas hatshysy Antonıý Gýterrıshpen jumys babynda kezdesti, dep habarlaıdy Senattyń baspasóz qyzmeti.
Áńgime barysynda Qazaqstan men BUU yntymaqtastyǵynyń máseleleri talqylandy. Q. Toqaev bizdiń elimiz BUU-ny balamasyz ári ámbebap uıym retinde qarastyratynyn aıtty.
«Qazaqstannyń BUU Qaýipsizdik Keńesiniń jumysyna belsene atsalysýy elimizdiń syrtqy saıasatynyń basym baǵyty bolyp tabylady. Biz sondaı-aq BUU-ny reformalaý jónindegi Bas hatshynyń kúsh-jigerin qoldaımyz», - dedi Senat Tóraǵasy.
A. Gýterrısh Prezıdent N. Nazarbaevtyń bitimgerlik salasyndaǵy, atap aıtqanda, Sırııadaǵy shıelenisti retteýge baǵyttalǵan qyzmetin joǵary baǵalady.
Bas hatshynyń pikirinshe, «EKSPO-2017» halyqaralyq kórmesi Qazaqstannyń ekonomıkalyq áleýeti men halyqaralyq bedeli joǵarylaı túskeniniń naqty kórinisi bolyp tabylady.