Toqaev: BUU mıssııasy — búkil álemniń Qazaqstan armııasyna degen zor senimi

ASTANA. KAZINFORM — Prezıdent Qasym-Jomart Toqaev elordanyń Táýelsizdik alańynda ótip jatqan áskerı paradta Qazaqstan armııasynyń bitimgerlik qyzmettegi jetistikterine toqtaldy.

— Jurtymyzdyń erlik dástúri ǵasyrlar boıy urpaqtan urpaqqa mıras bolyp keledi. Altyn Orda, Qazaq handyǵy kezindegi bahadúr babalarymyz keń baıtaq jerimizdi qorǵap, keıingi býynǵa amanat etti. Olardyń búgingi izbasarlary qazaqtyń memlekettiligin qas qaqpaı kúzetip tur. Aıbyndy armııa — Táýelsizdigimizdiń qorǵany, — dedi Qasym-Jomart Toqaev.

Prezıdent QR Qarýly Kúshteri álemdegi turaqtylyq pen kelisimdi saqtaýǵa úles qosyp kele jatqanyn atap ótti.

— Jaýyngerlerimiz Birikken Ulttar Uıymynyń bitimgerlik mıssııasyna oıdaǵydaı qatysýda. Bul — búkil álemdegi Qazaqstan armııasyna degen zor senim, — dedi Memleket basshysy.

Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan. Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysady. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıyǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qospaq.