Toqaev BUU quramynda Halyqaralyq sý uıymyn qurýdy usyndy
AShHABAD. KAZINFORM — Qazaqstan Prezıdentiniń paıymdaýynsha, jahandyq sý dıplomatııasyn damytýda memleketter arasyndaǵy yqpaldastyqtyń mańyzy zor. Bul týraly Memleket basshysy Túrikmenstandaǵy halyqaralyq forýmda aıtty.
Prezıdenttiń sózinshe, BUU júıesinde tek sý máselesimen aınalysatyn arnaýly qurylym joq. Bul túıtkildi tez arada sheshken jón.
— Qazaqstan Halyqaralyq sý uıymyn qurýdy usynady. Sol arqyly BUU aıasyndaǵy túrli uıymdardyń barlyq mandatyn bir maqsatqa jumyldyrýǵa bolady. UN-Water vedomstvoaralyq tetigin BUU-nyń tolyqqandy arnaýly agenttigine nemese uıymyna aınaldyrý ońtaıly sheshim bolar edi. Mundaı bastamany iske asyrý BUU-nyń ornyqty damý maqsattary men barsha halyqaralyq qoǵamdastyqtyń múddesine saı keledi. Kelesi jyly sáýir aıynda Astanada Aımaqtyq ekologııalyq sammıt ótedi. Atalǵan jıynda Qazaqstan jahandyq sý uıymyn qurý týraly halyqaralyq konsýltatsııa protsesin bastaýǵa nıetti. Ortaq saıası erik-jigerdiń arqasynda kún tártibindegi sýdyń ózekti máseleleri júıeli túrde sheshile bastaıtynyna senimim kámil, — dedi Memleket basshysy.
Qazaqstan Prezıdenti sózin qorytyndylaı kele, Ashhabad forýmy múddeli memleketterdiń jasampaz seriktestigin nyǵaıtýǵa jáne álemde ádiletti tártip qalyptastyrýdy kózdeıtin halyqaralyq kúsh-jigerge tyń serpin beretinine senim bildirdi.
Jıynda Túrikmenstan Prezıdenti Serdar Berdimuhamedov, Reseı Prezıdenti Vladımır Pýtın, Túrkııa Prezıdenti Rejep Taııp Erdoǵan, Iran Prezıdenti Masýd Pezeshkıan, Armenııa Prezıdenti Vaagn Hachatýrıan, Irak Prezıdenti Abdýl Latıf Rashıd, Qyrǵyzstan Prezıdenti Sadyr Japarov, San-Tome jáne Prınsıpı Prezıdenti Karlýsh Manýel Vıla-Nova, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Ázerbaıjan Premer-mınıstri Alı Asadov, Grýzııa Premer-mınıstri, Pákistan Premer-mınıstri Shahbaz Sharıf, Mıanma Premer-mınıstri No So, Esvatını Premer-mınıstri Rassel Dlamını sóz sóıledi.
Budan buryn Toqaev Qazaqstan dinaralyq jáne etnosaralyq dıalogty nyǵaıtýǵa aıryqsha nazar aýdaratynyn aıtqan edi.