Toqaev: Bul sapar eki el qarym-qatynasynyń tarıhı kezeńine bastaý bolady
ASTANA. KAZINFORM – Bul týraly Qasym-Jomart Toqaev BAQ ókilderine arnalǵan brıfıng kezinde aıtty.
Prezıdent aýyl sharýashylyǵy yqpaldastyqtyń mańyzdy salasy sanalatynyna toqtaldy
– Qazaqstan bıdaıyn túrikmen naryǵyna jetkizý kólemin arttyrýdy egjeı-tegjeıli talqyladyq. Sonymen qatar ósimdik maıy, makaron jáne et-sút ónimderiniń eksportyn ulǵaıtýǵa múmkindigimiz bar. Túrikmenstan-Aýǵanstan shekarasynda astyq termınalyn salý perspektıvasyn pysyqtadyq, – dedi Prezıdent.
Qasym-Jomart Toqaevtyń aıtýynsha, energetıka salasyndaǵy birlesken jobalarǵa basa mán berilgen.
Qazaqstan túrikmen gazyn Qytaıǵa tasymaldaýda uzaq jyldar boıy senimdi seriktes bolyp keledi. Búgingi kelissózder qorytyndysy boıynsha taraptar gazdy qaıta óńdeý, kógildir otyn jetkizetin ınfraqurylymdy damytý jobalary aıasyndaǵy yqpaldastyqty jalǵastyrýǵa ýaǵdalasqan. Oǵan byltyr qol qoıylǵan Gaz salasyn damytý boıynsha strategııalyq yntymaqtastyq jónindegi kelisim negiz bola alady.
Elimiz memlekettik qyzmet kórsetýdi tsıfrlandyrý jáne ІT tehnologııalardy engizý isindegi tájirıbesin eskere otyryp, túrikmen tarapyn atalǵan salada birlesken jobalardy júzege asyrýǵa shaqyrdy.
Qasym-Jomart Toqaev bul sapar eki el qarym-qatynasynyń tarıhı kezeńine bastaý bolatynyn aıtty.
Budan keıin ekijaqty qarym-qatynasty óristetýde mádenı-gýmanıtarlyq baılanystar erekshe oryn alatyny aıtyldy.
– Qazaq halqy Astanada ótken Túrikmenstannyń Mádenıet kúnderi men túrikmen halqynyń uly oıshyly Maqtymquly Pyraǵynyń 300 jyldyǵyna oraı eskertkishiniń ashylýyn jyly qabyldady. Ashhabadta Abaıǵa eskertkish qoıylýy halyqtarymyzdyń dostyǵy men bir-birine qurmetiniń taǵy bir sımvoly boldy. Festıvalder, gastrolder jáne basqa da birlesken is-sharalar ótkizý arqyly mádenıet salasynda jan-jaqty yqpaldastyq ornatý qajet ekenine toqtaldyq. Ǵylym-bilim berý jáne jastar arasyndaǵy baılanysty damytý perspektıvasy jan-jaqty talqylandy. Túrikmenstanda qazaqstandyq joǵary oqý oryndarynyń biriniń fılıalyn ashý múmkindigin qarastyrýdy usyndyq, – dedi Memleket basshysy.
Kelissózder barysynda prezıdentter óńirlik jáne halyqaralyq kún tártibiniń ózekti máseleleri boıynsha uqsas ustanymda ekenin rastaǵan.
– Óńirlik, sondaı-aq jahandyq aýqymda turaqtylyq, qaýipsizdik jáne ornyqty damýdy qamtamasyz etý úshin túrikmen tarapymen tyǵyz yqpaldastyq ornatýǵa ázirmiz. Konsýltatıvtik kezdesýler ótkizý, sondaı-aq Kaspıı teńiziniń problemasy jóninde yqpaldastyq ornatý óte ózekti. Qazaqstan Ashhabadtyń bastamasy boıynsha jarııalanǵan Halyqaralyq beıbitshilik jáne senim jyly aıasynda Túrikmenstan ótkizgen is-sharalardy joǵary baǵalaıdy, – dedi Prezıdent.
Qasym-Jomart Toqaev sóz sońynda Prezıdent Serdar Berdimuhamedovtiń sapary Qazaqstan men Túrikmenstan arasyndaǵy dostyq, tatý kórshilik jáne strategııalyq seriktestikti nyǵaıtýǵa zor úles qosatynyna senimdi ekenin jetkizdi.
Serdar Berdimuhamedov memleketter arasyndaǵy strategııalyq seriktestikti odan ári keńeıtýge qatysty Túrikmenstannyń ustanymymen bólisti.
– Ekijaqty kún tártibin talqylaý barysynda saýda-ekonomıkalyq yntymaqtastyqty damytýǵa aıryqsha mán berildi. Ózara saýda-sattyq aıasyn keńeıtý jáne ártaraptandyrý, sondaı-aq ónerkásip kooperatsııasy salasynda birlesken aýqymdy jobalardy júzege asyrý úshin ınvestıtsııalyq saıasatty jandandyrý máseleleri qarastyryldy. Bul rette eki memlekettiń bıznes qoǵamdastyqtary arasyndaǵy iskerlik baılanystardy nyǵaıtýdyń mańyzy zor. Energetıka – ekijaqty yntymaqtastyqtyń basym baǵyttarynyń biri. Túrikmenstan bul baǵyttaǵy jumysty odan ári jalǵastyrýǵa daıyn. Sonymen qatar elimizdiń elektr energııasy men hımııa ónerkásibindegi seriktestikti nyǵaıtýǵa aıtarlyqtaı múmkindigi bar. Kólik jáne logıstıka ózara yqpaldastyǵymyzdyń strategııalyq sıpatqa ıe baǵyty sanalady. Qazirgideı kúrdeli geosaıası jáne geoekonomıkalyq ahýal kezinde Shyǵys – Batys jáne Soltústik – Ońtústik baǵdaryndaǵy kólik-tranzıt dálizderiniń jumysyn jandandyrý asa ózekti, – dedi Túrikmenstan Prezıdenti.
Aıta ketelik Qasym-Jomart Toqaev Túrikmenstan Prezıdentin Aqordada qarsy alǵan edi.