Toqaev bir palataly Parlament tóraǵasy laýazymyn ózine daıyndap jatyr degen sybysqa jaýap berdi

ASTANA. KAZINFORM – «Turkistan» gazetine suhbat bergen Memleket basshysy Qasym-Jomart Toqaev bir palataly Parlament tóraǵasy laýazymyn ózine daıyndap jatyr degen sybysqa jaýabyn aıtty.

– Bul – bos áńgime. Mundaı pikir meniń saıası qaǵıdattaryma qaıshy keledi. Men Qazaqstannyń prezıdenttik basqarý úlgisindegi memleket ekenin birneshe ret aıttym. Osydan 8 jyl buryn, ıaǵnı Aqordaǵa kelgenge deıin «Kúshti Prezıdent – Yqpaldy Parlament – Esep beretin Úkimet» tujyrymdamasyn jarııaladym. Jeke bastyń qamyn kúıttep, memlekettik júıeni tutastaı ózgerte salý baryp turǵan jaýapsyzdyq, tipti, adamgershilikke jatpaıtyn áreket bolar edi, - dedi Qasym-Jomart Toqaev.

Memleket basshysy elimiz úshin asa mańyzdy reformanyń bári jalpyhalyqtyq referendýmǵa shyǵarylatynyn aıtty.

- Bul jerde eshqandaı astyrtyn oılar joq. Meniń ustanymym barshaǵa belgili, saıası reformalar jalǵasa beredi. Uzaq merzimge arnalǵan jospardyń bir bóligi ádettegideı jaqyn arada jarııalanady, - dedi Prezıdent.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.