Toqaev «Bolashaq oıyndary» týraly: Jahandyq syn-qaterler órshigende mundaı jobalardyń mańyzy arta túsedi
ASTANA. KAZINFORM – «Bolashaq oıyndary» sport pen ıntellektiniń, shynaıy jáne vırtýaldy álemniń ózara úılesimin kórsetetin biregeı alańǵa aınaldy. Bul týraly Memleket basshysy Qasym-Jomart Toqaev týrnırdiń resmı ashylý rásiminde málimdep, jarystyń basty mıssııasy – túrli mádenıetterdi toǵystyryp, memleketter men halyqtar arasyn jaqyndatý ekenin atap ótti.
– Búgin elordamyzda, shyn máninde, erekshe is-shara ótip jatyr. Bul – sport pen ıntellektiniń úılesimi, sonymen qatar kúsh-qaırat pen zııatkerlik áleýettiń básekesi. Olar arasynda qarama-qaıshylyǵy joq, kerisinshe bir-birin tolyqtyratyn uǵymdar ekenine kózimiz jetip otyr. Aldaǵy saıystardyń túpki fılosofııalyq máni de – osynda, – dedi Prezıdent.
Q. Toqaevtyń aıtýynsha, osynaý jahandyq aýqymdaǵy oıyndar barsha adamzattyń jarasymdy ári beıbit bolashaǵyn aıshyqtaıdy.
– Qazaqstan qashanda halyqaralyq qaýymdastyqpen birge beıbitshilikti, qaýipsizdikti, ádilettilik pen damýdy qoldaı beredi. «Bolashaq oıyndarynda» sporttyń kúsh-qýaty, aqyl-oı men tsıfrlyq dáýirdiń orasan áleýeti úılesim taýyp, barshamyzǵa ortaq jasampazdyq ustanymymen tolyq úndesedi, – dedi Qasym-Jomart Toqaev.
Bul týrnır kereǵar dúnıelerdi bir arnaǵa toǵystyrady. Onyń negizinde shynaıy jáne vırtýaldy álem arasyndaǵy aqylǵa qonymdy tepe-teńdik jatyr.
– Búgin osy arenaǵa negizinen jastar jınalyp otyr. Sizder bilimdi, talantty, eńbekqor, talapty bolsańyzdar, bolashaqtyń irgetasy bekemdele túsetini anyq. Alda ózderińizdi bıik belesterge bastaıtyn soqtyqpaly-soqpaqsyz jol kútip tur. Oı-pikiri ortaq, múddesi bir, senimdi serikter jandaryńyzdan tabylǵanda ǵana bul joldy eńserý ońaı bolmaq, – dedi Memleket basshysy.
Oıynǵa qatysýshylardyń árqaısysy tyńǵylyqty daıyndyqtan ótti. Olar óz komandalarynyń namysyn abyroımen qorǵaýǵa ázir. Prezıdent «Bolashaq oıyndarynyń» basty mıssııasy – adamdardy jańa jetistikter jolynda jumyldyrý jáne jigerlendirý ekenin eske saldy.
– Úlken sport qaı kezde de ártúrli mádenıetterdi toǵystyryp, memleketter men halyqtar arasyn jaqyndatýǵa sebepker bolǵan. Sondyqtan jahandyq syn-qaterler órship turǵan jaǵdaıda osyndaı biregeı jobalardyń mán-mańyzy arta túsetini anyq. «Bolashaq oıyndary» elderimizdiń arasyndaǵy yntymaqtastyqtyń, dostyq pen kelisimniń «altyn kópirine» aınalady dep senemin». Endeshe, «Bolashaq oıyndary – 2026» saıysyn ashyq dep jarııalaımyn!, – dedi Qazaqstan Prezıdenti.
Aıta keteıik, Astanada «Bolashaq oıyndary – 2026» týrnıriniń ashylý rásimi ótti. Týrnır Astanada 29 shilde men 9 tamyz aralyǵynda ótedi. Jarysqa 34 elden 800-den astam sportshy qatysady.
Prezıdent Teleradıokesheni «Bolashaq oıyndary–2026» týrnıriniń televızııalyq túsirilimin jasaıdy.
