Toqaev bilim salasyndaǵy daý-damaıdy synady: Aıqaı-shý men dańǵazany tyńdaýǵa májbúrmiz
ASTANA. KAZINFORM — Memleket basshysy Qasym-Jomart Toqaev áleýmettik jelide bilim berý salasyna qatysty negizsiz daý-damaı men aıqaı-shýdyń kóbeıgenin synǵa aldy. Prezıdent burynǵy jáne qazirgi laýazymdy tulǵalardyń mundaı tartystarǵa aralasýy bilim júıesine paıda ákelmeıtinin aıtyp, sóz talastyrýdan góri naqty iske kóship, balalardyń bolashaǵyna baǵyttalǵan usynystarǵa basymdyq berýge shaqyrdy.
— Bilim joly — synaǵy men qıyndyǵy kóp jol. Osy jolda tabysqa jetip, beınettiń zeınetin kórý úshin, eń aldymen, tabandy eńbek etý qajet. Túptep kelgende, bárimizdiń maqsatymyz — bir, múddemiz — ortaq ekenin esten shyǵarmaǵan abzal, — dep atap ótti Prezıdent.
Qasym-Jomart Toqaev áleýmettik jelide bilim salasyna qatysty qyzý pikirtalastar bolatynyn eske saldy. Keıde mundaı daý-damaılarǵa bilim júıesiniń burynǵy jáne qazirgi laýazymdy tulǵalary aralasyp jatatyny kózge túsetin boldy.
— Mundaı tartystar bilim salasyna paıdasyn tıgizedi dep aıtý qıyn. Órkenıetti pikirtalastardyń ornyna aıqaı-shý men dańǵazany tyńdap otyrýǵa májbúrmiz. Tipti ustazdar qaýymy da ondaı pikirtalastardyń túpki mánin túsine almaı dal bolýda. Árıne, balalardyń bolashaǵy úshin alańdap, utymdy usynystar bildirý — bir bólek áńgime. Al janashyr bolyp emes, jaqsy atty bolý úshin pikir bildirý — tipten basqa másele. Ónbeıtin daýdy qýyp, órisimizdi keńeıte almaıtynymyz anyq. Qazir bos, burys sózdiń ýaqyty emes, naqty, durys istiń dáýiri. Osyny eskergen jón, — dedi Memleket basshysy.
Buǵan deıin Qasym-Jomart Toqaev Prezıdent «Órleý» ortalyǵyn synǵa alyp, pedagogterdi attestatsııalaý talaptaryn jeńildetýdi tapsyrǵan edi.
Elimizge taǵy bes myńnan astam muǵalim jetispeıdi.
Sondaı-aq Prezıdent elimizdegi mektep qurylysyn jandandyrýdy tapsyrdy.
