Toqaev: Bızneske qoldan zańsyz tosqaýyl jasaý – memleketke qarsy jasalǵan qylmys
ASTANA. KAZINFORM – Bızneske qoldan zańsyz tosqaýyl jasaý – memleketke qarsy jasalǵan qylmys. Bul týraly Quryltaı otyrysynda "Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
- Sonymen qatar ekonomıkalyq baptar boıynsha qylmystyq qýdalaýǵa tartylyp jatqan kásipkerlerden ótinishter áli de túsip jatyr. Sondyqtan ekonomıkalyq quqyq buzýshylyqtardy odan ári qylmyssyzdandyrý baǵytynda sharalar qabyldaý qajet.
Kásipkerlerge, ásirese, shaǵyn jáne orta bızneske teń múmkindik berip, ádil básekege jol ashý qajet. Keı jaǵdaıda osy talap saqtalmaıdy. Oǵan dálel: qazirdiń ózinde óndirýshiler, ásirese azyq-túlik salasyndaǵy kásiporyndar birqatar qıyndyqqa tap bolýda. Tipti, ádeıi jasalǵan kedergiler de bar, - dedi Qasym-Jomart Toqaev
Mysaly, Prezıdenttiń atap ótýinshe, ımporttyq taýarlardyń quny qoldan tómendetilip otyr. Al otandyq ónimderdiń ishki naryqqa shyǵý joly ádeıi shektelip jatady.
- Shynyn aıtqanda, bul – jemqorlyq. Sondyqtan osyndaı qıturqy áreketterdi toqtatý kerek. Mundaı ahýal elimizdiń kompanııalary men taýarlarynyń básekege qabiletin edáýir álsiretip jiberetini sózsiz. Osyndaı is-qımyldarǵa qatań tosqaýyl qoımasaq, ekonomıkamyzǵa zııan bolatyny aıdan anyq. Basqasha aıtsaq, bıznesti qorǵaý – ulttyq ekonomıkanyń derbestigin nyǵaıtý degen sóz. Al bızneske qoldan zańsyz tosqaýyl jasaý, bul – memleketke qarsy jasalǵan qylmys dep aıtsaq artyq bolmas. Sondyqtan kásipkerlerdi qoldaý tetikterin jetildirý, ıaǵnı nyǵaıtý qajet. Bul jumysty saýda birlestikteri aıasynda júrgizýge de bolady, - dedi Memleket basshysy.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.
