Toqaev birqatar quqyq buzýshylyqqa jazany qatańdatýdy usyndy
ASTANA. QazAqparat - Mal urlyǵy jáne adam ólimine ákelip soǵatyn jol qozǵalysy erejelerin saqtamaý salasyndaǵy quqyq buzýshylyqtarǵa jazany qatańdatý talap etiledi. Bul týraly búgin QR Parlamenti Senatyndaǵy zań shyǵarý protsesin jetildirý máseleleri jónindegi Úkimet saǵatynda joǵary palata spıkeri Qasym-Jomart Toqaev aıtty, dep habarlaıdy QazAqparat tilshisi.
«Zań shyǵarý protsesiniń jetkilikti túrde uıymdastyrylmaýy men josparlanbaýynyń saldary Zań jobalarynyń retsiz, ádette, kúntizbelik jyldyń sońǵy aılarynda nemese sessııa aıaqtalatyn kezde usynylýy bolyp tabylady. Mundaı tájirıbe zań jobalarymen júrgiziletin jumystyń sapasyna áser etpeı qoımaıdy», - dedi ol.
Senat tóraǵasy zań jobalarynyń tujyrymdamalyq negiziniń sapasyna da toqtalyp, keıbir jaǵdaılarda zań jobasyn retteýge tıis negizgi máseleler tujyrymdamalarda qamtylmaı jatatyndyǵyn basa aıtty.
«Atalǵan jaǵdaı ázirleýshilerdiń tarapynan zań jobalarynyń mazmunyna baılanysty, Parlament qabyldaǵan jaǵdaıda olardy iske asyrý tásilderine qatysty aıqyn kózqarastyń joq ekendigin kórsetedi», - dedi Senat spıkeri.
Qasym-Jomart Toqaev Zań shyǵarý júıesiniń negizine qatysty teńgerimdi ustanymnyń bolmaýy - erekshe talqylaý men qarastyrýdy qajet etetin bólek taqyryp ekendigin de atap ótti.
«Máselen, keıbir baǵyttar boıynsha biz qatańdatý ustanymdaryn basshylyqqa alsaq, basqa salalarda bosańdyq pen erkindikke jol beremiz. Osylaısha, tutastaı Qazaqstannyń zańdary ózara ishki qısynnan ajyrap, sáıkesinshe onyń quqyqtyq baǵdary zańǵa baǵyný, zańdy qurmetteý, quqyq buzýshylyqtardy azaıtý sııaqty basty múddelerden alshaqtaı túsedi. Onyń ústine, jynystyq qol suqpaýshylyqqa qarsy, esirtki quraldarynyń aınalymy men mal urlyǵy jáne adam ólimine ákelip soǵatyn jol qozǵalysy erejelerin saqtamaý salasyndaǵy quqyq buzýshylyqtardyń kóbeıýi olarǵa salynatyn jazany qatańdatýdy talap etedi»,- dedi Senat Tóraǵasy.
Onyń aıtýynsha, osyndaı sıpattaǵy qylmystar qoǵam ishinde ótkir pikirtalastar týdyrýda, sondyqtan da jeńil jaza qoldaný nemese, tipten, ózara kelisim jolymen (medıatsııa) qylmystyq jaýapkershilikten qutylý jaǵdaılaryna azamattar tarapynan kelispeýshilik bildirý - zańdy qubylys.
«Úkimettiń osy máselege aıryqsha mán berip, basa nazar aýdarýyn suraımyz»,- dedi Qasym-Jomart Toqaev.
