Toqaev birqatar elderdiń eks-prezıdentterine Qazaqstannyń qazirgi qadamdaryn túsindirdi
ASTANA. QazAqparat - Qazaqstan tarapy Eýroodaq pen Reseı arasyndaǵy qatynastardy jaqsartýǵa kúsh-jigerin salyp jatyr. Bul týraly Astana klýbynyń úshinshi otyrysy aıasyndaǵy paneldik sessııa jumysynda QR Senatynyń Tóraǵasy Qasym-Jomart Toqaev málim etti, dep habarlaıdy QazAqparat.
«Eýropa Qazaqstan úshin óte mańyzdy dep paıymdaımyz. Meniń oıymsha, sonymen qatar Eýropa barsha Ortalyq Azııa úshin de mańyzdy. Osy oraıda atalǵan óńir Eýropa úshin de mańyzy joǵary oıynshyǵa aınalýda. Sondyqtan da Eýropanyń bizdiń syrtqy saıası baǵytta orny erekshe bolary anyq», - dep toqtaldy Q. Toqaev.
Osy oraıda Senat Tóraǵasy Eýropa Qazaqstan úshin negizgi saýda seriktesteriniń biri ekenin eske salyp ótti.
«Búgin biz EAEO-nyń da mańyzdylyǵyna toqtaldyq. Bul taǵy bir ıntegratsııalyq birlestiktiń biri. Osy uıym aıasynda tıisti problemalar bar ekenin moıyndaý kerek, bul óz kezeginde batystyń Reseıge qarsy qoıylǵan sanktsııalarynan týyndap otyr. Qazaqstan men Reseıdiń shekarada shektesetin aýmaǵy aıtarlyqtaı úlken, sondyqtan bul sanktsııalar Qazaqstan úshin de keri áser etýde», - dedi Qasym-Jomart Toqaev.
Bul rette QR Senatynyń Tóraǵasy búginde Qazaqstan tarapy AQSh, Reseı, Eýroodaq ustanymdaryn biriktirýge tyrysyp jatqanyn qadap aıtty.
«Biz olardy ymyraǵa keltirýge tyrysýdamyz, ıaǵnı tek saýda salasynda ǵana emes, sonymen qatar kúrdeli saıası máselelerde bir mámilege keltirýge kúsh-jigerimizdi salýdamyz. Árıne, bul ońaı sharýa emes. Osy maqsatqa qol jetkizý úshin kóp ýaqyt kerek, alaıda bul problemalardy sheshpeı, erkin saýda jaıynda aıtý qıyndaý»,-dep túsindirdi ol.
Aıta keteıik, «EO - Úlken Eýrazııa: seriktestik pen damý vektorlary» atty saıasattanýshylardyń ashyq paneldik sessııasyna Túrkııanyń burynǵy perzıdenti Abdolla Gúl, Chehııanyń eks-prezıdenti Vatslav Klaýs, Slovenııanyń burynǵy prezıdenti Danılo Tıýrk qatysýda.
