Toqaev: Bir maýsymdyq gúlderge jyl saıyn shyǵyndaný – qarjyny jelge shashý

ASTANA. QazAqparat – Bir maýsymdyq gúlderge jyl saıyn shyǵyndaný – qarjyny jelge shashý degen sóz. Memleket basshysy Qasym-Jomart Toqaev elordany damytý máseleleri jónindegi keńeste osylaı dep, ákimdikke 3 jyldyń ishinde kópjyldyq ósimdikterdiń úlesin keminde 50 paıyzǵa jetkizýdi tapsyrdy, dep habarlaıdy QazAqparat.

«Kelesi másele – kógaldandyrý. Qazir Astanany jasyl qala dep aıta almaımyz. Bizde qalany kógaldandyrý isiniń birtutas tujyrymdamasy da joq. Ár ákimdik óz bilgenimen áreket jasaıdy. Shahardaǵy jasyl-jelektiń sany men sapasy týraly naqty málimet joq, ıaǵnı júıeli jumys júrgizilmeıdi.

«Astana-kógaldandyrý qurylysyna» qarasty tálimbaqtyń múmkindigi tolyq qoldanylmaı otyr. Durys kútim bolmaǵan soń, qala aýmaǵyndaǵy kóshetter qýrap jatyr. Kógaldandyrý kezinde otyrǵyzylatyn jasyl-jelektiń 10 paıyzy ǵana – kópjyldyq ósimdikter. Bir maýsymdyq gúlderge jyl saıyn shyǵyndaný – qarjyny jelge shashý degen sóz.

Ákimdikke 3 jyldyń ishinde kópjyldyq ósimdikterdiń úlesin keminde 50 paıyzǵa jetkizýdi tapsyramyn. Sizderge naqty mindet qoıamyn: aldaǵy 5 jylda elordamyz jasyl shaharǵa aınalýy kerek. Qala aýmaǵynda jáne onyń mańaıynda 50 jerge zańsyz qoqys tógilgen. Bul jerler áli kúnge deıin tazalanbaı jatyr. Astana qalasynyń jáne Aqmola oblysynyń ákimdigine Ekologııa mınıstrligimen birlesip, bul máseleni dereý sheshýdi tapsyramyn», - dedi Prezıdent.