Toqaev: Bet-júzdi tumshalaıtyn qara kıimnen góri ózimizdiń ulttyq kıimderimiz áldeqaıda artyq

BÝRABAI. KAZINFORM – Ulttyq bolmysymyzdyń mańyzdy kórinisi ulttyq kıimdi jan-jaqty dáripteý kerek. Bul týraly Ulttyq quryltaıdyń IV otyrysynda Memleket basshysy Qasym-Jomart Toqaev aıtty.

- Ulttyq biregeıligimizdi nyǵaıtý jolynda mádenıet salasy aıryqsha ról atqarady. Ásirese, tól mádenıetimizdegi Áz-Naýryz meıramynyń orny bólek. Naýryz merekesi týraly jańa tujyrymdama ázirlendi. Elimiz Ulystyń uly kúnin 14 naýryzdan, ıaǵnı Amal kúninen bastap, on kún boıy atap ótetin boldy. Ár kúnge naqty ataý berildi. Jurtshylyq bul bastamany jaqsy qabyldady. Ásirese, Naýryznamadaǵy «Ulttyq kıim kúni» qoǵamnyń zor qoldaýyna ıe boldy. Ulttyq kıimderge degen qyzyǵýshylyq arta tústi, - dedi Qasym-Jomart Toqaev.

Memleket basshysynyń atap ótýinshe, mektepterde, túrli mekemelerde, sondaı-aq, iri kompanııalarda ulttyq kıimge mán berile bastady. Suranysqa saı tigin tsehtary ashylyp, jańa brendter, dúkender paıda boldy. 

- Osylaısha, ulttyq kıim kııý birtindep qalypty kóriniske aınalyp keledi. Bul – óte jaqsy úrdis. Bet-júzdi tumshalaıtyn qara kıimnen góri ózimizdiń ulttyq kıimderimiz áldeqaıda artyq. Ásirese, áıelderdiń dástúrli kıimi óte ǵajap kórinedi. Sebebi ulttyq kıim bul – bizdiń biregeı ulttyq bolmysymyzdyń mańyzdy kórinisi. Ony jan-jaqty dáripteýimiz kerek, - dedi Prezıdent.

Buǵan deıin Memleket basshysy qazaqtyń bolmysyna jat ıdeologııalarǵa tosqaýyl qoıý qajettigin aıtqan edi.