Prezıdent Belgııany Qazaqstannyń EO-daǵy negizgi seriktesteriniń biri dep atady
ASTANA.KAZINFORM — Qazaqstan Prezıdenti Qasym-Jomart Toqaev pen Belgııa Premer-mınıstri Bart de Vever eki el yntymaqtastyǵynyń qazirgi jaı-kúıi men perspektıvasyn talqylap, saıası dıalogty nyǵaıtý, saýda-ekonomıkalyq jáne ınvestıtsııalyq baılanystardy damytýǵa aıryqsha nazar aýdardy. Bul týraly Aqorda málim etti.
Memleket basshysy Belgııany Qazaqstannyń Eýropalyq Odaqtaǵy basty seriktesteriniń biri retinde atady. Qasym-Jomart Toqaevtyń aıtýynsha, ekonomıkalyq yqpaldastyqtyń qarqyny budan da zor áleýetke ıe. Belgııa Qazaqstan ekonomıkasyna qarjy quıǵan 10 jetekshi ınvestordyń qataryna kiredi. Sońǵy 20 jylda atalǵan elden kelgen tikeleı ınvestıtsııanyń jalpy kólemi 15 mıllıard dollardy qurady. Ózara saýda aınalymy da turaqty túrde ósip keledi. Onyń kólemi byltyr 580 mıllıon dollardan asty.
— Qazaqstanda Belgııa kapıtalynyń úlesi bar 110-nan astam kompanııa jumys isteıdi. Bul ózara tıimdi yntymaqtastyqty nyǵaıtýǵa degen ortaq umtylysymyzdy ańǵartady. Tanymal belgııalyq kompanııalar bizdiń eldiń naryǵyna kóptep kelip jatyr, — dedi Qasym-Jomart Toqaev.
Premer-mınıstr Bart de Vever eki el arasynda saıası dıalog deńgeıi joǵary ekenin atap ótti.
Ol Belgııanyń ekijaqty qarym-qatynasty odan ári tereńdetýge jáne strategııalyq seriktestik aıasyn keńeıtýge nıetti ekenin málimdedi. Taraptar kólik-logıstıka, asa mańyzdy mıneraldar, munaı hımııasy, aýyl sharýashylyǵy, ónerkásip, tsıfrlyq transformatsııa, jasandy ıntellekt jáne qarjy salalaryndaǵy birlesken ınvestıtsııalyq jobalardy iske asyrý múmkindikterin qarastyrdy.
Budan bólek, ǵylym jáne bilim berý salasyndaǵy yqpaldastyq, ásirese, ýnıversıtetter, zertteý ortalyqtary men tehnologııalyq kompanııalar arasyndaǵy seriktestikti ilgeriletý perspektıvasy pysyqtaldy. Memleket basshysy oraıly sátti paıdalana otyryp, Belgııa Koroli Fılıppke jáne Koroleva Matıldaǵa izgi sálemin joldady. Prezıdent ekijaqty qatynastar tarıhynda alǵash ret Korol Fılıpptiń bıyl Qazaqstanǵa jasaıtyn memlekettik saparyna aıryqsha mán beretinin atap ótti.
Qasym-Jomart Toqaev Bart de Veverdi ózine qolaıly ýaqytta Qazaqstanǵa resmı saparmen kelýge shaqyrdy. Premer-mınıstr shaqyrýdy yqylaspen qabyl aldy. Sondaı-aq taraptar óńirlik jáne halyqaralyq kún tártibiniń ózekti máseleleri jóninde pikir almasty.
Buǵan deıin Qasym-Jomart Toqaev Eýropalyq keńes Prezıdenti Antonıý Koshtamen beıresmı kezdesý ótkizdi.
