Toqaev: Belgııa – Qazaqstannyń Eýropadaǵy senimdi seriktesi
ASTANA. KAZINFORM — Qazaqstan Prezıdenti Belgııalyqtar Korolimen jáne Patshaıymymen shaǵyn quramda kelissóz júrgizdi. Bul týraly Aqordanyń baspasóz qyzmeti habarlady.
Kelissóz barysynda Prezıdent Belgııalyqtar Koroli men Patshaıymynyń Qazaqstanǵa jasaǵan alǵashqy memlekettik sapary ekijaqty seriktestiktiń jańa kezeńine jol ashatyn tarıhı ýaqıǵa ekenin atap ótti.
– Sizdi Astanada qarsy alǵanyma qýanyshtymyn. Bul – men úshin zor mártebe. Tarıhı saparyńyz jurtshylyqtyń úlken qyzyǵýshylyǵyn týdyrdy. Qazaqstanǵa kelgen delegatsııa quramyna Úkimet pen aımaqtyq bılik, iskerlik toptar, akademııalyq qaýymdastyq jáne buqaralyq aqparat quraldary ókilderi engen. Siz Taq murageri retinde Qazaqstanǵa úsh márte kelgen edińiz. Elimizben qarym-qatynasty damytý jónindegi nıetińizdi joǵary baǵalaımyz. Sizdiń qoldaýyńyzdy árdaıym sezinemiz, – dedi Qasym-Jomart Toqaev.
Qasym-Jomart Toqaev Belgııany Qazaqstannyń Eýropadaǵy ýaqyt synynan ótken senimdi seriktesi dep sanaıtynyn jetkizdi.
– Kelesi jyly elderimizdiń arasynda dıplomatııalyq qarym-qatynas ornaǵanyna 35 jyl tolady. Osy jyldarda shynaıy dostyq pen ózara qurmetke negizdelgen tyǵyz qarym-qatynasty jolǵa qoıdyq. Úzdiksiz saıası dıalog yntymaqtastyǵymyzdyń berik tuǵyry ispettes. Biz jetistikterińizdi udaıy qarap otyramyz. Bul shyn máninde tańǵaldyrady. Sizderden úlgi alyp, tájirıbelerińizdi úırenýimiz qajet. Belgııaǵa bes jyl buryn jasaǵan sapar barysyndaǵy mazmundy kelissózderdi yqylaspen eske alamyn. Bıyl maýsym aıynda Belgııaǵa barǵan saparymda Premer-mınıstr Bart de Vevermen kelissóz júrgizip, seriktestikti nyǵaıtýǵa qos tarap ta beıil ekenin rastadyq, – dedi Memleket basshysy.
Korol Fılıpp pen Patshaıym Matılda qonaqjaılyǵy jáne syı-qurmeti úshin Qazaqstan Prezıdentine shynaıy rızashylyǵyn bildirdi.
Olar elimizdiń áleýmettik-ekonomıkalyq tabystaryna jáne halyqaralyq arenadaǵy bıik abyroı-bedeline arnaıy toqtaldy.
– Qazaqstan – biz úshin qarqyndy damyp kele jatqan óte mańyzdy el. Jalpy, Belgııa tutas Ortalyq Azııa óńirine aıryqsha qyzyǵýshylyqpen qaraıdy. Bul óńirdiń máni zor. Menimen birge úlken delegatsııa keldi. Álbette, biz bir-birimizdi óte jaqsy bilemiz. Elderimiz 35 jyl ishinde jaqsy qarym-qatynas ornatty. Biz osy tarıhı mejeni birge atap ótýge nıettimiz. Sonymen qatar yntymaqtastyǵymyzdy jańa sapaly deńgeıge kóteretinimizge senimdimin. Menimen birge kelgen delegatsııa quramyna keleshekke baǵdarlanǵan túrli salanyń ókilderi kirdi. Prezıdent myrza, bizben birge júrý úshin jumys kesteńizdi ózgertkenińizdi bilemin. Osy yqylasyńyzǵa tántimiz. Sondyqtan altyn ýaqytyńyzdy bólip, qurmet kórsetkenińizdi joǵary baǵalaımyz, – dedi Belgııalyqtar Koroli Fılıpp.
Aıta ketelik Belgııalyqtar Koroli Fılıpp pen Matılda patshaıym Aqordaǵa kelgen edi.
