Toqaev: Baýyrlas el retinde Túrkııanyń odan ary ósip-órkendeýin tileımiz
ASTANA. KAZINFORM – Túrik eli qýatty ekonomıka men salmaqty dıplomatııanyń arqasynda kúlli túrki dúnıesin jalǵaǵan altyn kópir retinde tanyldy. Bul týraly Táýelsizdik saraıynda ótip jatqan Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesiniń 6-otyrysynda Memleket basshysy Qasym-Jomart Toqaev aıtty.
- Men byltyr Ankaraǵa jasaǵan resmı saparymdy zor rızashylyqpen eske alamyn. Sapar kezinde jasalǵan ýaǵdalastyqtar qazaq-túrik baılanysyn jańa deńgeıge kóterdi dep kúmánsiz aıtýǵa bolady. Biz baýyrlas el, senimdi seriktes retinde Túrkııa Respýblıkasynyń odan ary ósip-órkendeýin tileımiz. Búginde elińiz áleýmettik-ekonomıkalyq damýdyń jańa kezeńine qadam basty. Túrli salada eleýli tabysqa qol jetkizdi. Sizdiń salıqaly, sarabdal saıasatyńyzdyń nátıjesinde Túrkııanyń álemdegi yqpaly men bedeli arta tústi, - dedi Qasym-Jomart Toqaev Túrkııa Prezıdenti Rejep Taııp Erdoǵanǵa qarata.
Memleket basshysynyń paıymynsha, túrik eli qýatty ekonomıka men salmaqty dıplomatııanyń arqasynda Eýropa men Azııany, kúlli túrki dúnıesin jalǵaǵan altyn kópir retinde tanylyp otyr.
- Memleketińizdiń jetistikteri Sizdiń ult múddesin qorǵaý jolyndaǵy qajyrly eńbegińizdiń jemisi dep bilemiz. Elińizdegi barlyq strategııalyq maqsat-mindetterdiń tabysty júzege asýyna, Túrkııanyń saıası-ekonomıkalyq áleýetiniń arta túsýine árdaıym tilektespiz, - dedi Qazaqstan Prezıdenti.
Sonymen qatar Memleket basshysy jańa ǵana shaǵyn quramda mazmuny, nátıjeli kelissózder ótkizilgenin atap ótti.
- Qazaq-túrik qarym-qatynasyn odan ary kúsheıtýdiń strategııalyq baǵyttaryn anyqtadyq. Yqpaldastyqty barynsha keńeıtýge múddeli ekendigimizdi taǵy da rastadyq. Eki eldiń saıası ustanymy bir, nıeti ortaq. Ekonomıkalyq áleýetimiz de zor. Búgingi Qazaqstan men Túrkııa arasyndaǵy Joǵary deńgeıdegi strategııalyq yntymaqtastyq keńesiniń kezekti otyrysy ortaq maqsattarǵa qol jetkizýge jol ashady dep sanaımyn, - dedi Prezıdent.
Buǵan deıin Memleket basshysy Qasym-Jomart Toqaev elimizge memlekettik saparmen kelgen Túrkııa Prezıdenti Rejep Taııp Erdoǵandy Táýelsizdik saraıynda resmı qarsy alǵan edi.
Aıta keteıik, otyrys barysynda Qazaqstan Prezıdent qazirgi tańda qazaq-túrik ekijaqty qarym-qatynasy keńeıtilgen strategııalyq seriktestik rýhynda qarqyndy damyp jatqanyn, elderimizdiń arasynda eshqandaı túıtkil joq ekenin basa aıtty.
