Toqaev barlyq etnomádenı birlestikti «Taza Qazaqstan» aktsııasyna belsene qatysýǵa shaqyrdy

ASTANA. KAZINFORM — Memleket basshysy Qasym-Jomart Toqaev Qazaqstan halqy Assambleıasynyń HHHІV sessııasynda barlyq etnomádenı birlestikti «Taza Qazaqstan» aktsııasyna belsene qatysýǵa shaqyrdy.

— Meniń bastamammen byltyrdan beri «Taza Qazaqstan» aktsııasy júzege asyrylyp jatyr. Jalpyulttyq jobaǵa 6 mıllıonnan astam adam qatysty. 1,6 mıllıon tonnadan asa qoqys jınaldy. 3,3 mıllıon kóshet otyrǵyzyldy. «Taza Qazaqstan», bul — bizdiń búgingi jáne erteńgi kúnimizdiń kepili. Sondyqtan jumys úzdiksiz jalǵasa beredi. Biz ár azamattyń, ásirese, jastardyń boıyna tazalyq, uqyptylyq, jaýaptylyq sııaqty qasıetterdi sińirýimiz kerek. Taza ıa tazalyq, bul — kıeli sózder. Ary taza adam eshqashan elin satpaıdy. Biz «Qazaqstan — ortaq úıimiz» dep únemi aıtamyz. Sondyqtan elimiz taza, tartymdy, mádenıetti bolýy kerek. Assambleıa bul ıdeıany jan-jaqty dáriptep keledi. Bul — óte tıimdi ári paıdaly jumys. Tazalyq ár úıden bastalýy kerek. Sonda ǵana «Taza Qazaqstan» bolamyz, — dedi Memleket basshysy.

Qasym-Jomart Toqaev kishkentaı kezinen tazalyqqa úırengen bala keıin jaýapkershiligi joǵary, sanaly azamat bolyp ósetinin eske saldy.

— Sondyqtan búgin men Qazaqstan halqy Assambleıasynyń múshelerin, barlyq etnomádenı birlestikti «Taza Qazaqstan» jalpyulttyq aktsııasyna belsene qatysýǵa shaqyramyn. Bul — jaı naýqan emes, bul — óskeleń urpaqqa ozyq bilim men tálim-tárbıe berý degen sóz. Barshamyzǵa qatysy bar ıdeologııalyq mańyzdy iske ár qalanyń, aýyldyń, kósheniń jáne aýlanyń turǵyndaryn jumyldyrý kerek. «Taza Qazaqstan», bul — shynaıy otanshyldyqtyń kórinisi. Bárimiz Ádiletti, Qaýipsiz jáne Taza Qazaqstanda ómir súrgimiz keledi, — dedi Prezıdent.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr. Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».

Buǵan deıin Prezıdent etnosaralyq qatynas máselesin eshqashan saıasat quralyna aınaldyrýǵa bolmaıtynyn aıtty.

Sonymen qosa Toqaev Qazaqstanda adamdy ultyna, tiline, dinine qaraı kemsitý eshqashan bolmaǵanyn atap ótti.