Toqaev Balqash AES qurylysyn keler jyly bastaýdy usyndy
ASTANA. KAZINFORM — Memleket basshysy Qasym-Jomart Toqaev keler jyly «Balqash» atom elektr stantsııasynyń qurylysyn bastaýdy, sondaı-aq «Moıynqum» AES-iniń qurylysyn jedeldetý úshin keshendi yntymaqtastyq týraly kelisimge qol qoıýdy usyndy.
Prezıdent Atom energetıkasyn damytý aıryqsha mańyzdy ekenin eske saldy.
– Jalpyhalyqtyq referendýmnyń qorytyndysy boıynsha atom elektr stantsııasyn, tipti birden birneshe stantsııa salý týraly durys sheshim qabyldandy. Endi atom elektr stantsııalaryn aldaǵy elý jylda jáne odan keıin de ýran shıkizatymen qalaı qamtamasyz etetinimizdi oılastyrý kerek, — dedi Qasym-Jomart Toqaev Qazaqstan halqyna Joldaýynda.
Prezıdent Qazaqstandaǵy AES-terdiń qajettiligin aldaǵy júz jyl boıy óteýge múmkindik beretin Memlekettik strategııalyq ýran qoryn qurý usynysyn baıyppen qarastyrýǵa turarlyq ekenin aıtty.
— AES salýǵa qatysyp jatqan sheteldik seriktesterdi Qazaqstanda joǵary tehnologııaly óndirister ashýǵa, ıadrolyq energetıka salasyndaǵy bilim men tájirıbeni berýge, otandyq atom salasy mamandaryn daıarlaýǵa tartý mańyzdy. Mundaı usynystardy Reseı men Qytaı kompanııalary da bildirip otyr. Keler jyldyń ózinde «Balqash» AES-iniń qurylysyn bastaýdy, sondaı-aq «Moıynqum» AES-iniń qurylysyn múmkindiginshe tezirek qolǵa alý úshin keshendi yntymaqtastyq týraly kelisimge qol qoıýdy oryndy, tipti qajet dep sanaımyn, — dedi Memleket basshysy.
Bul rette kelissózderdegi barlyq ustanym Qazaqstannyń ulttyq múddelerin eskere otyryp, muqııat pysyqtalyp, kelisilýi keregi aıtyldy.
Buǵan deıin Prezıdent Ulttyq qordyń eń basty mıssııasyn ataǵan edi.
Sondaı-aq Toqaev Qazaqstannyń tranzıttik áleýetin synǵa aldy.