Toqaev Baladjı Shrınıvasanmen kezdesti: Qazaqstanda Network School iske qosyldy
ASTANA. KAZINFORM — Qasym-Jomart Toqaev Network School jobasynyń Qazaqstandaǵy tehnologııalyq ekojúıeniń qalyptasýyna qosqan úlesin joǵary baǵalap, yntymaqtastyqty nyǵaıtýǵa daıyn ekenin jetkizdi. Bul týraly Aqorda málim etti.
Prezıdent elimiz tehnologııany tereń meńgergen kóshbasshylardyń jańa býynyn tárbıeleý úshin bilim, ǵylym jáne tsıfrlyq quzyretke belsendi ınvestıtsııa salyp jatqanyna nazar aýdardy.
Osy oraıda, Memleket basshysy jobanyń negizin qalaýshyǵa jýyrdaǵy Joldaýynda jarııalanǵan «Halyqtyq qurylys» bastamasy keleshek urpaqqa mańyzdy ári shyn máninde salmaqty mura qaldyrýǵa múmkindik beretinin aıtty.
— Baǵdarlama aıasynda jappaı áleýmettik ınfraqurylym nysandaryn, sonyń ishinde mektepter, ýnıversıtetter men medıtsına mekemelerin salý josparlanyp otyr. Qasym-Jomart Toqaev Astanada Network School Kazakhstan jelisiniń iske qosylýyn jáne jobanyń Qazaqstan ýnıversıtetterimen, startaptarymen, sondaı-aq tehnologııalyq kásiporyndarymen seriktestikti keńeıtý nıetin quptady, — delingen habarlamada.
Sonymen qatar Prezıdent Astana AI Film festıvaline ınvestıtsııalyq turǵydan qoldaý kórsetkeni úshin Baladjı Shrınıvasanǵa rızashylyǵyn bildirdi. Network School negizin qalaýshy Qazaqstanda ozyq tehnologııalyq sheshimder men ekonomıkanyń dástúrli salalary úılesim taýyp otyrǵanyn aıryqsha atap ótti.
Baladjı Shrınıvasan Network School Kazakhstan jobasynyń basym baǵyttaryn tanystyrdy. Onda tsıfrlyq sheshimderdi ilgeriletý, adam kapıtalyn damytý jáne ınnovatsııalyq ázirlemelerdi engizýge qolaıly jaǵdaı jasaý kózdelgen
