Toqaev Ázerbaıjanmen qandaı jobalardy birlese júzege asyrýǵa bolatyndyǵyn aıtty

ASTANA. QazAqparat – Qazaqstan men Ázerbaıjan Úkimetterine birlese júzege asyrýǵa bolatyn iri jobalardy aıqyndaý tapsyryldy. Bul týraly Ázerbaıjan Prezıdenti Ilham Álıevpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Bizdiń ekonomıkalarymyzdyń jańa ósim núkteleri bolýy múmkin údemeli ınvestıtsııalyq jobalardy júzege asyrýǵa jeke toqtaldyq. Ónerkásip, toqyma, agroónerkásip, qurylys salalarynda iri kásiporyndardy birlese ashýǵa bolady. Biz eki eldiń Úkimetterine birlese iske qosý úshin iri jobalardy aıqyndaýdy tapsyrdyq», - dedi Memleket basshysy.

Prezıdent aýyl sharýashylyǵy salasynda da ózara yntymaqtastyq úshin áleýettiń zor ekendigine nazar aýdartty.

«Ótken jyldyń qorytyndysynda agroónerkásip kesheni ónimderiniń ekijaqty saýda-sattyq kólemi 3 ese artyp, 146 mln dollardy qurady. Osylaısha, búginde aýyl sharýashylyǵynyń úlesi bizdiń jalpy taýar aınalymynyń úshten birine tıesili bolyp otyr. Biz aýyl sharýashylyǵy ónimderin ózara jetkizýdi odan ary ulǵaıtýdyń mańyzdylyǵyn atap óttik», - dedi Qasym-Jomart Toqaev.