Toqaev: Ázerbaıjan arqyly qazaq munaıyn álemdik naryqqa shyǵarý – basym mindet

ASTANA. QazAqparat – Transkaspıı halyqaralyq kólik baǵyty áleýetin tolyqqandy ashý zor mańyzǵa ıe. Bul týraly Ázerbaıjan Prezıdenti Ilham Álıevpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Transkaspıı halyqaralyq kólik baǵyty áleýetin tolyqqandy ashý zor mańyzǵa ıe. Sóz logıstıkalyq qyzmetti jetildirý, biryńǵaı kólik operatorlaryn qurý, tehnıkalyq jáne tarıftik sharttardy jańǵyrtý, ákimshilik kedergilerdi joıý jáne tuıyq logıstıkalyq tsıkl qalyptastyrý jaıynda bolyp otyr. Sonymen qatar 2022-2027 jyldarǵa arnalǵan Orta dálizdi damytý jónindegi jol kartasyn tıimdi júzege asyrý zor mańyzǵa ıe. Biz bul baǵytqa arta túsken qyzyǵýshylyqty tolyqtaı qoldaý jáne onyń ınfraqurylymdyq damýyna úshinshi eldi tartý mańyzdy ekendigine kelistik. Bul is-sharalardyń barlyǵy, sondaı-aq halyqaralyq seriktesterimizben ózara tyǵys is-qımyl «Shyǵys-Batys» baǵytynda júkterdi turaqty jne jedel jetkizýge kepildik berýge jol ashady», - dedi Qasym-Jomart Toqaev.

Memleket basshysy kelissózder barysynda energetıka salasyndaǵy yntymaqtastyqty ulǵaıtýǵa da basa nazar aýdarylǵanyna toqtaldy.

«Búginde álemdik naryqqa energııa resýrstaryn jetkizýdi odan ári ártaraptandyrý bizdiń basym mindetimiz sanalady. Ózderińiz de biletindeı, bıyl bizdiń ýaǵdalastyǵymyzdyń arqasynda Ázerbaıjan arqyly qazaqstandyq munaıdyń birinshi partııasy jóneltilgen bolatyn. Kelesi qadam – jetkizý kólemin arttyrý jáne oǵan uzaqmerzimdi turaqty sıpat berý», - dedi Prezıdent.