Toqaev Aýyl sharýashylyǵy qyzmetkerleriniń forýmyn jyl saıyn ótkizýdi usyndy
ASTANA. KAZINFORM – Aýyl turǵyndarynyń turmys jaǵdaıyn jaqsartýǵa atsalysatyn kásipkerler men sharýa qojalyqtar memlekettiń kómegine júgine alady. Bul týraly Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev aıtty.
«Memleket tarapynan aýyl sharýashylyǵy salasyna mamandar daıarlaýǵa úlken kóńil bólinip keledi. Sońǵy jyldary elimizde jetekshi sheteldik joǵary oqý oryndarynyń fılıaldary ashylyp jatyr. Onyń tórteýi agronom, melıorator, bıotehnolog jáne ekolog sııaqty aýyl sharýashylyǵy salasynda suranysqa ıe mamandardy halyqaralyq baǵdarlamalar boıynsha daıarlaıdy. Jalpy, memleket pen bıznes aýyldaǵy barlyq máseleni birlesip sheshýi kerek. Agroónerkásippen aınalysý úshin aýylǵa kelgen jas kásipkerlerdi baǵalaımyn. Memleket te sizderdiń eńbekterińizdi umyt qaldyrmaıdy», - dedi Qasym-Jomar Toqaev.
Memleket basshysy Joldaýynda Úkimet pen barlyq memlekettik organdar otandyq bızneske, sheteldik ınvestorlarǵa jol ashýy kerek ekenin tapsyrǵan eske saldy.
«Aýyl turǵyndaryna qol ushyn sozyp, olardyń turmys jaǵdaıyn jaqsartýǵa atsalysatyn kásipkerler men sharýa qojalyqtar memlekettiń kómegine júgine alady. Olardyń ınvestıtsııalyq jobalaryna qoldaý kórsetip, bıýrokratııalyq kedergi keltirmeý kerek. Bir sózben aıtqanda, sharýalarmen tyǵyz qarym-qatynasta jumys isteý qajet. Úkimet pen ákimder jerdi tabys kózine aınaldyryp, aýyldaǵy áleýmettik máselelerdi sheshýge atústi qaraıtyndarǵa tosqaýyl qoıýǵa tıis. Jaýapkershiligi mol kásipkerler men ınvestorlar ǵana eldegi oń ózgeristerdiń naǵyz kóshbasshysy bola alady. Sizder yntymaq-birlik pen naǵyz patrıotızmniń ozyq úlgisin kórsetip, aýyl turǵyndarynyń jaǵdaıyn jaqsarta beresizder dep senemin. Memleket sizderge jan-jaqty qoldaý kórsetip, laıyqty baǵalaıdy. Memleket pen agrobıznes arasyndaǵy baılanysty jaqsartý úshin búgingi Forýmdy jyl saıyn ótkizýdi usynamyn», - dedi Prezıdent.
