Toqaev «Astrahan-Mańǵystaý» sý qubyryn jańǵyrtýdy tapsyrdy

NUR-SULTAN. QazAqparat – «Astrahan-Mańǵyshlaq» sý qubyryn jańǵyrtý qajet. Bul týraly búgin Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Sý – aımaqtyń ornyqty damýy úshin qajetti basty resýrstyń biri. Alaıda, Jaıyq ózeni qatty tartylyp, onyń ekologııalyq ahýaly kúnnen kúnge nasharlap barady. Bul másele onsyz da aýyz sýǵa muqtaj bolyp otyrǵan jergilikti turǵyndardy tolǵandyryp otyr. Aýyl sharýashylyǵy ónimin óndirýshiler de úlken qıyndyqtarǵa tap bolyp jatyr. Biz Jaıyq ózeni ańǵarynyń ekojúıesin saqtaý jóninde 2024 jylǵa deıingi Qazaqstan-Reseı yntymaqtastyǵy týraly baǵdarlama qabyldadyq. Úkimet osy baǵdarlamada kózdelgen is-sharalardy ýaqtyly qarjylandyrýy kerek. Sonymen birge, Reseı jaǵymen birlesip, jedel sharalar qabyldaýy qajet», - dedi QR Prezıdenti.

Memleket basshysynyń dereginshe, búginde oblys turǵyndarynyń bir bóligi jáne óńirdegi birqatar iri munaı óndirýshi kompanııa «Astrahan-Mańǵystaý» magıstraldy sý qubyrynyń sýyn tutynyp otyr. Al uzyndyǵy 1 myń shaqyrymnan asatyn qubyr búginde 80 paıyzǵa tozǵan.

«Osyǵan baılanysty tek Atyraý ǵana emes, atalǵan sý qubyryn paıdalanyp otyrǵan Mańǵystaý oblysyna da sý berýde shekteýlerdiń oryn alý yqtımaldyǵy joǵary. Bul búkil turǵyndy alańdatqan, qordalanǵan másele. Ony sheshetin ýaqyt jetti. Úkimet pen «Samuryq-Qazyna» qoryna «Astrahan-Mańǵystaý» sý qubyryn jańǵyrtý jáne jańartýdy qamtamasyz etýdi tapsyramyn»,- dedi Qasym-Jomart Toqaev.