Toqaev áskerı reforma máseleleri boıynsha Qaýipsizdik Keńesiniń otyrysyn ótkizdi
ASTANA. KAZINFORM — Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń otyrysy ótti.
Aqordanyń baspasóz qyzmetiniń habarlaýynsha, negizgi másele — áskerı reforma josparynyń jobasy.
Memleket basshysy elimizdegi aýqymdy ózgeristerdi eskere otyryp, qorǵanys salasyn reformalaý jóninde usynystar ázirleýdi jáne ony Qaýipsizdik Keńesiniń qaraýyna engizýdi tapsyrdy.
Prezıdent qysqa merzimde zamanaýı, utqyr ári tehnologııalyq turǵydan ozyq armııa qurýdyń aıryqsha mańyzyna nazar aýdardy.
— Qarýly kúshterdiń sapasyn ózgertý mindeti qoıyldy. Ózgerister basqarý isin, áskerı qyzmetshilerdi daıarlaýdy, kadr saıasatyn, áskerı bilim berýdi, qorǵanysty josparlaý men tehnologııalyq jaraqtandyrýdy qamtýǵa tıis. Áskerı qyzmettiń qaýipsizdigine, áskerge basshylyq etý mádenıetine jáne memleket resýrstaryn tıimdi paıdalanýǵa aıryqsha mán berý kerek. Armııanyń qoǵammen qarym-qatynasy da ózgerýge tıis. Keshendi reforma qajet. Bul iste tolyqqandy sheshimder qabyldanbaıynsha, kózdegen nátıjege jetý múmkin emes, — dedi Qasym-Jomart Toqaev.
