Toqaev áskerdiń jaýyngerlik ázirligi men qorǵanys bıýdjetine qatysty tapsyrma berdi
ASTANA. KAZINFORM — Prezıdent — Qarýly kúshterdiń Joǵarǵy Bas Qolbasshysy Qasym-Jomart Toqaev Qorǵanys mınıstriniń birinshi orynbasary — Qarýly Kúshter Bas shtabynyń bastyǵy Aıtqurman Omarbekovti jáne Qorǵanys mınıstriniń orynbasary Tatıana Savelevany qabyldady.
Memleket basshysy Qarýly kúshterdiń qazirgi qyzmeti men jaýyngerlik ázirligi, áskerı daıarlyq is-sharalaryn qarjylaı qamtamasyz etý, Qorǵanys mınıstrligi bıýdjetiniń oryndalýy týraly esepti tyńdady.
Joǵarǵy Bas Qolbasshyǵa jaýyngerlerdiń jaı-kúıi men áskerdi jumyldyrý daıyndyǵy, sondaı-aq vedomstvo organdaryna jáne sarbazdarǵa júktelgen mindetterdiń oryndalýy týraly baıandaldy.
Prezıdentke áskerdiń aǵymdaǵy qajettilikterin qarjylandyrý jáne armııany damytý baǵdarlamasy týraly málimet berildi. Sondaı-aq áskerı ázirlik mindetterin eskere otyryp qarajatty qaıta bólý, ınfraqurylymdy jaraqtandyrý jáne bólimshelerdiń kúndelikti qyzmetin qamtamasyz etý máseleleri talqylandy.
Áskerdi basqarý júıesin jetildirý, sheshim qabyldaý jedeldigin arttyrý jáne sarbazdyń mamandanǵan baǵytyna qaraı mindetterdi oryndaýǵa daıyndyǵyna aıryqsha mán berildi.
Budan bólek, mobılızatsııany josparlaý jáne áskerı rezervti daıyndaý, josparlanǵan shyǵyndardy negizdeý, bıýdjet tártibin saqtaý, bólingen qarjyny paıdalaný tıimdiligin arttyrý máseleleri, sondaı-aq qarjylyq baqylaý men shyǵystardyń nátıjeliligin baǵalaý tásilderi qarastyryldy.
Kezdesý qorytyndysy boıynsha Memleket basshysy Qarýly Kúshterdiń saqadaı saı bolýyna jáne áskerı ázirlik sapasyna qatysty, sonymen qatar armııanyń eń basty qajettilikterin qarjylyq turǵydan óteý jáne bıýdjet qarajatyn utymdy paıdalaný máseleleri boıynsha birqatar mindet júktedi.
