Toqaev: AShM ázirlegen qaýly aýqymdy jeri barlardyń ıeligin saqtaý talpynysyna uqsaıdy

NUR-SULTAN. QazAqparat – QR Prezıdenti Qasym-Jomart Toqaev Úkimettiń keńeıtilgen otyrysynda bir adamnyń qansha jerge ıelik ete alatynyn normatıvpen bekitýdi tapsyrdy, dep habarlaıdy QazAqparat tilshisi.

«Jerdi utymdy paıdalaný máselesindegi mańyzdy mindetterdiń biri – onyń bir qolǵa shoǵyrlanýyna jol bermeý. Men bul týraly buryn da aıtqanmyn. Bul jerde men ónimniń emes, jerdiń shoǵyrlanýyn aıtyp otyrmyn. Neǵurlym kóbirek jer alyp, biraq ınvestıtsııa salmaıtyndar bar. Birqatar óńirde máslıhat sheshimimen úles mólsheri ǵylymı negizdelgen tásildersiz bekitilgen. Atyraý oblysynda bir adamǵa - 89 myń gektar, Almaty oblysynda - 96 myń gektar, Shyǵys Qazaqstan oblysynda - 69 myń gektar jer bólinip ketken. Al aýyl sharýashylyǵy mınıstrligi bir qolda 98 myń gektarǵa deıin aýyl sharýashylyǵy jerin ustaýǵa ruqsat beretin qaýly jobasyn ázirledi. Bul - qazir qolynda aýqymdy alqaptary bar adamdardyń ıeligin saqtap qalý áreketine uqsaıdy. ıAǵnı, osy úrdisti normatıvtik baza retinde bekitýge talpyný», - dedi Qasym-Jomart Toqaev.

Onyń aıtýynsha, memleket bir adamnyń aýqymdy jer ýchaskelerine ıelik etýine qarsy emes.

«Munyń jaqsy jaǵy bar. Ekonomıkalyq aınalymǵa jer kóbirek túsedi, ondaı aýqymnyń tıimdiligi de bolady – básekege qabilet artady. Oǵan qarymta qatań mindettemeler, jerdi naqty paıdalaný jaýapkershiligi bolýy kerek. Sondyqtan Úkimetke jer ýchaskeleriniń shekti mólsherin anyqtaý úshin sarapshylar men ǵylymı ınstıtýttardyń qatysýymen jumys tobyn qurýdy tapsyramyn. Ony osy jyldyń 1 mamyryna deıin bekitý kerek», -dedi Prezıdent.