Toqaev: Arnaıy mártebesi bar qalalar kapıtal úshin batyl básekege túsýi kerek
QONAEV. KAZINFORM – Memleket basshysy ınvestorlarǵa barynsha jaıly jaǵdaı jasalýǵa tıis jáne olarǵa joǵary deńgeıde qyzmet kórsetýdi asa mańyzdy mindet retinde atady. Bul týraly Aqordanyń baspasóz qyzmeti habarlady.
— Qolaıly ınvestıtsııalyq ahýal qalyptastyrý kerek. Qazir aldymyzda turǵan jumys — asa mańyzdy: ınvestorlarǵa barynsha jaıly jaǵdaı jasalýǵa tıis jáne olarǵa joǵary deńgeıde qyzmet kórsetilýi qajet. Eń aldymen halyqaralyq talaptardyń qatań saqtalýyna basa mán bergen jón. Ásirese, ulttyq zańnama júıesinde qamtylmaǵan máseleler boıynsha álemdik ozyq tájirıbeni keńinen qoldanǵan abzal.
Naǵyz ozyq ári jedel damý jolyna túsemiz desek, bul jumysty mindetti túrde qolǵa alýymyz kerek. Tıisti laýazymdy tulǵalar eshkimnen qoryqpaı, batyl sheshimder qabyldaýy kerek. Bul ótinish ıa keńes emes, bul — naqty tapsyrma. Arnaıy quqyqtyq mártebesi bar qalalar jahandyq kapıtaldy tartý úshin dál osylaı batyl ári belsendi jumys istep, aldyńǵy qatarǵa shyǵady, — dedi Prezıdent.
Memleket basshysy IT, ónerkásip, kólik jáne logıstıka, týrızm, medıtsına, bilim berý salalaryn damytý óte mańyzdy ekenin aıtty.
— Shetel ınvestıtsııasyn qorǵaý, «bir tereze» qaǵıdaty boıynsha qyzmet kórsetý, sharttardyń ashyqtyǵyn jáne memleket usynatyn kepildikterdiń buljymastyǵyn qamtamasyz etý — negizgi másele, kezek kúttirmeıtin mindet.
Bul saladaǵy jumystyń bári nátıjeli bolsyn desek, ınvestorlardy kóptep tartý kerek bolady, al ol úshin qolaıly orta jasaýymyz kerek jáne tıimdi ekojúıeni qurýymyz qajet.
Bul, árıne, óte aýqymdy sharýa. Sondyqtan aldymen ózekti, ıaǵnı basymdyqqa ıe baǵyttarǵa aıryqsha mán berý kerek: IT, ónerkásip, kólik jáne logıstıka, týrızm, medıtsına, bilim berý salalaryn damytý óte mańyzdy, — dedi ol.
Aıta ketelik Memleket basshysy Alataý qalasynyń damý barysymen tanysqan edi.
