Toqaev: Altyn Ordanyń tarıhı rólin jan-jaqty nasıhattaýǵa aýqymdy jumys qajet
ASTANA. KAZINFORM — Qazaqstan tarıhynyń akademııalyq jınaǵynda alǵash ret Altyn Ordaǵa jeke tom arnalyp otyr. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Altyn Orda murasy — ushan-teńiz. Biz osy alyp rýhanı, tarıhı qazynany HHІ ǵasyrǵa beıimdep, jańǵyrtý úshin júıeli jumys júrgizip kelemiz. Meniń bastamammen Qazaqstanda Joshy Ulysyn zerdeleý ınstıtýty quryldy. Bul — osy taqyrypty tereń zertteýmen aınalysatyn tuńǵysh ǵylymı mekeme. Qazirgi tańda ázirlenip jatqan Qazaqstan tarıhynyń akademııalyq jınaǵynda alǵash ret Altyn Ordaǵa jeke tom arnalyp otyr, — dedi Qasym-Jomart Toqaev.
Osy oraıda Prezıdent Joshy Ulysynyń mol tarıhı-mádenı murasyn jurt jadynda jańǵyrtý úshin fılmder túsirilip, kitaptar shyǵarylyp jatqanyn eske saldy. Sondaı-aq spektaklder de qoıylyp, eskertkishter ornatylyp, kórmeler ótkizilip jatyr.
— Alaıda Altyn Ordanyń mán-mańyzyn tereń zerdelep, onyń tarıhı rólin jan-jaqty nasıhattaý úshin múlde jańa, ıaǵnı, halyqaralyq aýqymdaǵy jumys istelýi qajet, — dedi Memleket basshysy.
Prezıdent Altyn Orda sol kezeńdegi kóptegen memleketke qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
