Toqaev: Alpaýyt derjavalardyń geosaıası talas-tartysy áli de órship tur
ASTANA.QazAqparat - Sırııa men Ýkraınadaǵy jaǵdaı alpaýyt derjavalardyń geosaıası talas-tartysy áli de órship turǵanyn kórsetti. Bul týraly búgin Álemdik jáne dástúrli dinder kóshbasshylary sezi hatshylyǵynyń XVI otyrysynda QR Parlamenti Senatynyń tóraǵasy Qasym-Jomart Toqaev málim etti, dep habarlaıdy QazAqparat.
«Sırııa men Ýkraınadaǵy jýyrda oryn alǵan jaǵdaı alpaýyt derjavalardyń geosaıası talas-tartysy áli de bolsa órship turǵanyn kórsetip otyr. Birlik bolmaǵandyqtan halyqaralyq terrorızmmen kúresý de qıynǵa soǵýda. Al onyń oshaqtary jer sharynyń ár jerinen beleń alyp keledi. Soltústik Koreıanyń ıadrolyq synaqtarǵa jappaı tyıym salý týraly shart rejimin buzýy ıadrolyq apattyń birinshi qaterine aınaldy»,- dedi Toqaev.
Senat spıkeriniń aıtýynsha, kóptegen elderde álemdik tártipti quldyratý, ksenofobııany órshitý, etnostyq jáne dinı belgiler boıynsha kemsitý qaýipine ushyratatyn popýlızmge umtylý úrdisi shegine jetip tur.
«Jer betindegi órkenıettiń barlyq jetistikterin joq qyla alatyn jahandyq ekonomıkalyq, áleýmettik jáne ekologııalyq problemalar da Jer sharynyń qaýipsiz bolashaǵyna qater tóndirýde. Qoǵamda tirshilik etýdiń rýhanı máni buzylyp, adamgershilik negizderiniń joıylyp bara jatýy da asa qaýipti qubylys. Bul jahandyq syn qaterlerdi barsha adamzattyń qoǵamdasqan kúsh-jigerimen ǵana eńserýge bolady», dedi ol.
