Toqaev Almatydaǵy mektep qurylysyn jandandyrý baǵytynda tapsyrma berdi
ALMATY. QazAqparat - Qazaqstan Prezıdenti Qasym-Jomart Toqaev Almatydaǵy kezdesý barysynda mektepter men balabaqsha tapshylyǵy týraly aıtty, dep habarlaıdy QazAqparat tilshisi.
«Almatydaǵy orta mektepterde 30 myńnan astam oryn tapshy. Keıbir bilim mekemeleriniń bastaýysh synybynda 40 bala oqıdy. Maǵan habarlaǵandaı, 173 mekteptiń synybynda oqýshylardyń sany 50-ge deıin ósken. Sońǵy bes jyl ishinde 4200 oryndyq 5 jańa mektep salynypty, ıaǵnı jylyna bir mektep. Bul qanaǵattarlyqtaı kórsetkish emes», - dedi Qasym-Jomart Toqaev.
Memleket basshysy balalar sany tek arta túsetindigin, sondyqtan búginen bastap tıisti ınfraqurylymdy daıyndaý kerek ekenin atap ótti.
«Qaladaǵy 202 mekteptiń 21% -y kúrdeli jóndeýdi qajet etedi. Qala ákimdigi bul baǵyttaǵy jumysty jandandyrýy kerek, óıtkeni erteń bul mektepter apatty bolýy múmkin. Almatydaǵy oqýshylardyń 5% -na ǵana tegin ystyq tamaq beriledi. Bul elordaǵa qaraǵanda, 10 ese az. Qarajat tartý máselesin jedel sheshý qajet», - dedi Qazaqstan Prezıdenti.
Onyń aıtýynsha, taǵy bir mańyzdy másele - balalardy balabaqshamen qamtamasyz etý.
«Búgingi tańda balabaqsha kezeginde 57 myń bala tur. Sondyqtan MJÁ tetikterin qoldana otyryp, mektepke deıingi bilim berýdiń jańa uıymdaryn engizý qarqynyn edáýir jedeldetý qajet», - dep túıindedi Q. Toqaev.
