Toqaev Alem.ai bazasynda «Ortalyq Azııa – Koreıa» ozyq tehnologııalar ortalyǵyn qurýdy usyndy
ASTANA. KAZINFORM – Memleket basshysynyń aıtýynsha, jasandy ıntellekt pen tsıfrlyq tehnologııalar salasyndaǵy yntymaqtastyqty nyǵaıtýdyń áleýeti zor.
Qazaqstan bul baǵyttyń tabysty damýyna barynsha kúsh salady.
– Elimizde salalyq mınıstrlik quryldy, Alem.ai halyqaralyq ortalyǵy ashyldy, eki sýperkompıýter iske qosyldy. Tsıfrlandyrý jáne jasandy ıntellekt jylyn jarııalaý osy salanyń damýyna tyń serpin berdi. Birqatar mańdaıaldy bastamalardy iske asyryp jatyrmyz. Olardyń qatarynda qýaty 1 gıgavatt bolatyn «Derekterdi óńdeý ortalyqtarynyń alqabyn» qurý jobasy da bar. Kadrlyq jáne ǵylymı áleýetimiz de nyǵaıyp keledi. Elimizdegi alǵashqy arnaýly ýnıversıtet – Qazaq AI Research University maman daıarlaýǵa kiristi. Tehnologııalyq seriktestigimizdi jańa ári sapaly deńgeıge shyǵarý úshin Astanadaǵy Alem.ai bazasynda «Ortalyq Azııa – Koreıa» ozyq tehnologııalar ortalyǵyn qurýdy usynamyz, – dedi Prezıdent.
Aýyl sharýashylyǵy salasy da nazardan tys qalǵan joq.
Memleket basshysy byltyr Qazaqstan rekordtyq kólemde, ıaǵnı 27 mıllıon tonnadaı astyq jınaǵanyn málimdedi.
– Agroónerkásip ónimderimiz álemniń 70-ten astam eline jetkiziledi. Eksport kólemi 7 mıllıard dollarǵa jetti. Qazaqstan jer resýrstaryna baı. Al Koreıa aýyl sharýashylyǵynyń tıimdiligin arttyrý jáne oǵan joǵary tehnologııalardy engizý isinde kósh bastap tur. Básekege qabiletti artyqshylyqtarymyzdy biriktirip, tamaq ónerkásibinde birlesken klaster qurýdy usynamyn. Atalǵan klasterdiń qyzmeti óndiriske, tereń óńdeýge jáne ónimdi syrtqy naryqqa eksporttaýǵa baǵyttalady. Qazaqstan koreı kompanııalaryna úlken naryq usynyp qana qoımaı, óndiris oryndaryn ashýǵa, tehnologııalardy engizýge jáne Eýrazııa naryǵyna shyǵýǵa mol múmkindik beredi. Bul koreı bıznesiniń kókjıegin keńeıte túsedi. Sonymen qatar tutas Ortalyq Azııaǵa naqty mýltıplıkatıvti áserin tıgizedi, – dedi Memleket basshysy.
Prezıdenttiń pikirinshe, aımaqtyń ekonomıkalyq tabysyn elderdiń ornyqty damýynan bólek qaraýǵa bolmaıdy.
– Ortalyq Azııanyń ózara baılanysyn nyǵaıtý óńirdiń ekonomıkalyq áleýetin tolyq tanytady, halyqaralyq bızneske jol ashyp, aýqymdy birlesken jobalardy iske asyrýǵa tyń serpin beredi. Álemde tehnologııalyq jáne ekonomıkalyq turǵydan kóshbasshy sanalatyn Koreıa Respýblıkasymen yntymaqtastyqty tereńdetý osy maqsattarǵa jedel qol jetkizýge yqpal eteri sózsiz, – dedi Qasym-Jomart Toqaev.
Іs-shara barysynda Koreıa Respýblıkasynyń Prezıdenti Lı Chje Meń, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov jáne Ózbekstan Prezıdenti Shavkat Mırzıeev sóz sóıledi.
Aıta keteıik, Prezıdent Ortalyq Azııa men Koreıa jastaryna arnalǵan jańa baǵdarlama qabyldaýdy usyndy.
