Toqaev Aleksandr Sýdın, Nurqanat Jaqypbaı jáne Vıktor Hılnıchenkonyń eńbegin joǵary baǵalady
ASTANA. KAZINFORM — Prezıdent Qasym-Jomart Toqaev el damýyna úles qosqan úsh azamattyń eńbegin erekshe atap ótti, dep habarlaıdy Aqordanyń baspasóz qyzmeti.
Prezıdent memleketimizdiń damýyna Táýelsizdiktiń eleń-alańynan bastap belsene atsalysyp kele jatqan Aleksandr Sýdınge alǵys aıtty.
— Memlekettik qyzmette jumys istegen jyldary zor qurmetke ıe boldyńyz. Parlament Senatynyń depýtaty retinde halyq múddesin qorǵadyńyz. Vıtse-spıker jáne Senat apparatynyń basshysy retinde qazaqstandyq parlamentarızmniń damýyna qosqan úlesińizdi aıryqsha atap ótkim keledi. Sizdiń kásibı eńbegińiz joǵary baǵalanyp, Otanǵa adal qyzmet etýdiń úlgisine aınaldy, — dedi Memleket basshysy.
Prezıdent teatr jáne kıno salasynda jarty ǵasyrdan astam ýaqyt jumys istep kele jatqan belgili rejısser Nurqanat Jaqypbaıdyń tól mádenıetimizdi órkendetý jolyndaǵy eńbegi zor ekenin jetkizdi.
— Kórermenniń kózaıymy bolǵan mazmundy qoıylymdardy sahnalap, teatr áleminiń naǵyz maıtalmany retinde tanyldyńyz. Kóptegen pesalar men fılmderde túrli rólderdi sheber somdap, halyqtyń ystyq yqylasyna bólendińiz. Búginde jas talanttardy ónerge baýlyp, olarǵa baǵyt-baǵdar berip kelesiz. Rýhanııat salasyn damytýǵa sińirgen eńbegińiz úshin ózińizge shynaıy rızashylyǵymdy bildiremin, — dedi Qasym-Jomart Toqaev.
Qasym-Jomart Toqaev kásibı jolyn agronomdyqtan bastap «Hılnıchenko jáne K» seriktestiginiń basshysyna deıin kóterilgen Vıktor Hılnıchenkonyń agroónerkásip salasyn damytýǵa qosqan úlesine toqtalyp, Almaty oblystyq máslıhatynyń depýtaty retinde jemisti qoǵamdyq qyzmet atqarǵanyn da atap ótti.
— Eń bastysy, qol jetkizgen jetistikterińizge toqmeıilsimeı, aldyńyzǵa jańa ári bıik maqsattar qoıyp kelesiz. Aımaqtyń agroónerkásip áleýetin kóterýge qosqan zor úlesińiz qandaı baǵaǵa bolsa da laıyq, — dedi Memleket basshysy.
Budan buryn Qasym-Jomart Toqaev bir top qoǵam qaıratkerin memlekettik nagradalarmen marapattaǵanyn jazǵanbyz.
