Toqaev: Aldymyzda turǵan shuǵyl mindet — 500-ge jýyq aýylǵa sý berý jumysy

ASTANA. KAZINFORM — Aqordada sý sharýashylyǵy qyzmetkerlerin quttyqtap, memlekettik nagradalarmen marapattaǵan Memleket basshysy Qasym-Jomart Toqaev aldaǵy mindetterge toqtalyp ótti.

— Halyqty taza aýyz sýmen qamtamasyz etý aıryqsha mańyzdy mindet. Soǵy jyldary osy baǵytta naqty sharalar qabyldandy. Qala halqynyń jáne aýyl turǵyndarynyń kópshiligi taza aýyz sýmen qamtamasyz etildi. Endi aldymyzda turǵan shuǵyl mindet — 500-ge jýyq aýylǵa sý berý jumysy. Ásirese, aýyz sýdy tazalaý máselesin sheshý qajet. Halqymyz «Sýdyń da suraýy bar» dep tegin aıtpaǵan. Ár tamshy sýdyń qadirin bilgen. Sýdy tıimdi paıdalaný óte ózekti másele. Zańǵar jazýshy Ábish Kekilbaevtyń «Shyńyraý» povesinde sýdyń qasıeti, qudyqshynyń eńbegi týraly tereń oılar aıtylǵan, — dedi Prezıdent.

Qasym-Jomart Toqaev qazir elimizde sýdy únemdeý tarıfi iske qosylǵanyn aıtty.

— Az paıdalansań az tóleısiń degen qaǵıda engizildi. Sonymen qatar memleket sý únemdeý tehnologııasyn qoldanatyn sharýalarǵa belsendi kómek kórsetýde. Atap aıtqanda, jumsaǵan qarjysynyń 80 paıyzyna deıin óteıtin boldy. Búginde 470 myń gektar jerde osyndaı ozyq tehnologııa iske qosyldy. Bul jumys aldaǵy ýaqytta da jalǵasady. Sebebi sý únemdeý — bul aldymyzda turǵan asa mańyzdy strategııalyq mindet. Bul máselege qatysty tsıfrlandyrý jumysyn júrgizý óte ózekti. Ony qarqyndy túrde júzege asyrý kerek. Shyndyǵyn aıtsaq, qazirgi jaǵdaı jalpy máz emes. «Taza Qazaqstan» jalpy ulttyq aktsııasy aıasynda sýdy únemdeý mádenıeti jan-jaqty dáriptelip jatyr. Elimizdegi 2 mln astam oqýshy «Sýdy únemde, bolashaqta saqta!» atty aýqymdy jobaǵa qatysty. Óskeleń urpaq sýdyń qundylyǵyn bilý kerek. Ony ysyrap etpeý týraly jastaıynan bilip ósýi qajet, — dedi Memleket basshysy.

Memleket basshysy Qasym-Jomart Toqaev sóz basynda Qazaqstan úshin sý — ulttyq qaýipsizdik máselesi ekenin atap ótken bolatyn.