Toqaev: Aldaǵy eki jylda 200-den astam jańa óndiris orny ashylady
ASTANA. KAZINFORM — 2023-2025 jyldary Qazaqstanda jalpy quny 3,7 trıllıon teńge bolatyn 540 ındýstrııalyq joba iske asyryldy. Sonyń nátıjesinde 50 myńǵa jýyq turaqty jumys orny qurylyp, taǵy 200-den astam jańa óndiris ashylmaq. Bul týraly Memleket basshysy Qasym-Jomart Toqaev Parlament palatalarynyń sońǵy birlesken otyrysynda aıtty.
Prezıdenttiń aıtýynsha, elimizde kólik, turmystyq tehnıkalar, júk vagondaryn, qurylys materıaldaryn jáne basqa da sapaly ónimder shyǵaratyn zamanaýı zaýyttar ashylyp jatyr.
Tek 2023-2025 jyldary 540 ındýstrııalyq joba júzege asyryldy. Olardyń jalpy quny 3,7 trıllıon teńge boldy.
— Aldaǵy eki jylda taǵy 200-den astam óndiris orny iske qosylmaq. Osy maqsatqa shamamen 3 trıllıon teńge ınvestıtsııa tartylady. Bul — qazynaǵa túsetin salyq kólemi artady, óndiriske ozyq tehnologııalar engiziledi jáne eń bastysy, jańa jumys oryndary ashylady degen sóz, — dedi Qasym-Jomart Toqaev.
Іske qosylǵan jobalardyń arqasynda qazirdiń ózinde 50 myńǵa jýyq turaqty jumys orny paıda boldy. Qalǵan jobalar júzege asqan soń taǵy 20 myńnan astam adam jumyspen qamtylady.
— Memleket otandyq kásipkerlerdi qoldaýǵa basa mán berýde. Osy maqsatqa qomaqty qarjy bólinip jatyr. Jalpy, Qazaqstandaǵy jumysqa jaramdy azamattardyń jartysyna jýyǵy tabysyn shaǵyn jáne orta bıznesten taýyp otyr. Sońǵy bes jylda osy sektorda eńbek etetin adam sany 4,5 mıllıonǵa jetti. Jalpy ishki ónimniń 40% astamy shaǵyn jáne orta bıznes salasyna tıesili. Muny rekordtyq kórsetkish dep aıtýǵa tolyq negiz bar. Byltyr «Báıterek» holdıngi arqyly kásipkerlerge 8 trıllıon teńge kóleminde qoldaý kórsetildi, — dedi Memleket basshysy.
Eske salsaq, bıyl 1 qyrkúıekten bastap jańa Parlament — Quryltaı óz jumysyna kirisedi.
Ata zańnyń 94-babyna sáıkes, Respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady. Respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanady.
Naqtyraq aıtqanda, jańa Konstıtýtsııanyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.
Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi. Birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde Qazaqstan Respýblıkasynyń Prezıdenti Quryltaıdyń kelisimimen Vıtse-Prezıdentti taǵaıyndaýǵa tıis.
